အစားအသောက်နှင့် ထရိုင်ဂလစ်ဆာရိုက်

ထရိုင်ဂလစ်ဆရိုက် (Triglycerides) ဆိုသည်မှာ အဘယ်နည်း။

     ထရိုင်ဂလစ်ဆရိုက်သည် ခန္ဓာကိုယ်မှ အစားအစာတွင်ပါသော အဆီများမှ တိုက်ရိုက်ရရှိသည့် သို့မဟုတ် ကာဘိုဟိုက်ဒရိုက် ပိုလျှံစွာစားသုံးမိသည့်အခါ ထုတ်လုပ်ပေးသည့် အဆီတစ်မျိုးဖြစ်သည်။ ပိုလျှံနေသော စွမ်းအင်များကို ထရိုင်ဂလစ်ဆရိုက်အဖြစ် ပြောင်းလဲပြီး ခန္ဓာကိုယ်အနှံ့ရှိ အဆီတစ်ရှူးများတွင် သိုလှောင်ထားရှိသည်။

ထရိုင်ဂလစ်ဆရိုက် ပမာဏမြင့်မားခြင်း၏ ကျန်းမာရေးဆိုင်ရာ ဆိုးကျိုးများ

• နှလုံးနှင့် ဦးနှောက်သွေးကြောဆိုင်ရာ ရောဂါများဖြစ်ပွားနိုင်ခြေ တိုးမြင့်လာခြင်း
• ထရိုင်ဂလစ်ဆရိုက် ပမာဏ 1,000 mg/dL ထက်ကျော်လွန်ပါက အရေပြားတွင် အဝါရောင်အဖုများ သို့မဟုတ် အရည်ကြည်ဖုများ ဖြစ်ပေါ်လာခြင်း
• ရုတ်တရက် မုန့်ချိုအိတ်ရောင်ရမ်းသည့် ရောဂါဖြစ်ပွားနိုင်ခြေရှိခြင်း
• အသည်းနှင့် သီးခြေကြီးထွားလာခြင်း

ထရိုင်ဂလစ်ဆရိုက် ပမာဏမြင့်မားရခြင်း၏ အကြောင်းရင်းများ

• အဆီများသော အစားအစာများကို အလွန်အမင်း စားသုံးခြင်း
• ကာဘိုဟိုက်ဒရိုက် အလွန်အမင်းစားသုံးမိသဖြင့် ပိုလျှံသောစွမ်းအင်များ ထရိုင်ဂလစ်ဆရိုက်အဖြစ် သိုလှောင်မိခြင်း
• အရက်သေစာ အလွန်အမင်း သောက်သုံးခြင်း
• ကိုယ်အလေးချိန် လွန်ကဲခြင်း သို့မဟုတ် အဝလွန်ခြင်း
• ဆီးချို သို့မဟုတ် ကျောက်ကပ်ရောဂါကဲ့သို့ နောက်ဆက်တွဲ ရောဂါအခံများရှိခြင်း
• အချို့သော ဆေးဝါးများ သုံးစွဲခြင်း (ဥပမာ- သန္ဓေတားဆေး၊ ဟော်မုန်းဆေး၊ စတီရွိုက်ဆေးများ)
• မျိုးရိုးဗီဇဆိုင်ရာ အကြောင်းအရင်းများ
• ကိုယ်လက်လှုပ်ရှားမှု နည်းပါးခြင်း

ထရိုင်ဂလစ်ဆရိုက် မြင့်မားမှုကို စစ်ဆေးတွေ့ရှိခြင်း

     ပုံမှန်အားဖြင့် ခန္ဓာကိုယ်သည် အစားစားပြီး ၂ နာရီမှ ၃ နာရီအတွင်း သွေးတွင်းရှိ ထရိုင်ဂလစ်ဆရိုက်များကို ဖယ်ရှားပေးပါသည်။ ပုံမှန်သွေးတွင်း ပမာဏမှာ 50–150 mg/dL ဖြစ်သည်။ အနည်းဆုံး ၁၂ နာရီခန့် အစာငတ်ခံပြီးနောက် သွေးစစ်ဆေးမှုတွင် 150 mg/dL ထက်ကျော်လွန်နေပါက ခန္ဓာကိုယ်၏ ထရိုင်ဂလစ်ဆရိုက် ဖယ်ရှားမှုစနစ် အဆင်မပြေဖြစ်နေကြောင်း ဖော်ပြနေသည်။

ထိန်းသိမ်းစောင့်ရှောက်ခြင်းနှင့် ကာကွယ်ခြင်း

• အဆီများသော အသားများ၊ အသားအရေခွံများ၊ အကြော်အလှော်များ၊ အုန်းနို့ပါသော ဟင်းလျာများ၊ မုန့်ဖုတ်မုန့်များ၊ ဖတ်စ်ဖုဒ် (Fast food) နှင့် မုန့်ပဲသရေစာများကဲ့သို့ အဆီဓာတ်မြင့်မားသော အစားအစာများကို ရှောင်ကြဉ်ပါ
• အချိုရည်များ၊ သစ်သီးရည်များ၊ အအေးများ၊ အချိုပွဲများနှင့် ရေခဲမုန့်ကဲ့သို့ အချိုဓာတ်များသော အစားအစာများကို လျှော့ချပါ
• ကစီဓာတ်ပါသော အစားအစာများနှင့် ဒူးရင်းသီး၊ ပိန္နဲသီး၊ လုံငန်းသီးကဲ့သို့ အချိုဓာတ်မြင့်မားသော သစ်သီးများ စားသုံးမှုကို ကန့်သတ်ပါ
• အရက်သေစာ သောက်သုံးခြင်းကို ရှောင်ကြဉ်ပါ
• ကိုယ်အလေးချိန် လွန်ကဲပါက သို့မဟုတ် အဝလွန်နေပါက ကိုယ်အလေးချိန် လျှော့ချပါ
• တစ်ပတ်လျှင် ၃ ရက်မှ ၅ ရက်၊ တစ်ကြိမ်လျှင် အနည်းဆုံး ၂၅ မိနစ်မှ မိနစ် ၃၀ ထိ မှန်မှန် လေ့ကျင့်ခန်းလုပ်ပါ

ထရိုင်ဂလစ်ဆရိုက် လွန်ကဲခြင်းသည် အဝလွန်ခြင်းကို ဖြစ်စေရုံမျှမက နှလုံးသွေးကြောကျဉ်း ရောဂါဖြစ်ပွားနိုင်ခြေကိုလည်း မြင့်မားစေသည့် အဓိက အကြောင်းအရင်းဖြစ်သည်။