ခေါင်းကိုက်ရောဂါရက်ရှည်ဖြစ်ခြင်း - "ဦးနှောက်အကျိတ်" ကို သတိပြုပါ!

     နာတာရှည် ခေါင်းကိုက်ခြင်းသည် ဦးနှောက်ကျိတ်၏ လက္ခဏာတစ်ခု ဖြစ်နိုင်သောကြောင့် ပေါ့ဆ၍မရပါ။ ခေါင်းကိုက်ခြင်းသည် စိတ်ဖိစီးမှု၊ အိပ်ရေးပျက်ခြင်း၊ အမြင်အာရုံပြောင်းလဲခြင်း၊ ဆိုင်းနပ်စ်ပိုးဝင်ခြင်း သို့မဟုတ် လည်ပင်းနှင့် ပခုံးကြွက်သားများ တင်းတောင်းခြင်း အပါအဝင် အကြောင်းအရာများစွာကြောင့် ဖြစ်ပွားနိုင်သည်။ ခေါင်းကိုက်ခြင်းအများစုသည် အလိုအလျောက် သက်သာသွားလေ့ရှိသော်လည်း ဆရာဝန်နှင့် ပြသတိုင်ပင်သင့်သည့် အောက်ပါ သတိပေးလက္ခဏာ (၃) ချက်ကို သတိပြုသင့်ပါသည်။

ဆရာဝန်နှင့် ပြသရန် သတိပေးလက္ခဏာ (၃) ချက်

၁။ နာတာရှည် ခေါင်းကိုက်ခြင်း

     အနည်းဆုံး ၃ လဆက်တိုက် တစ်လလျှင် ၁၅ ရက်ထက်ပို၍ ခေါင်းကိုက်ဝေဒနာ ခံစားနေရပါက နာတာရှည် ခေါင်းကိုက်ခြင်းဖြစ်သည်။ ဒါဟာ ကြီးထွားလာသော ဦးနှောက်ကျိတ်ကြောင့် ဦးနှောက်အတွင်း ဖိအားမြင့်တက်လာပြီး ခေါင်းကိုက်ခြင်းကို ဖြစ်ပေါ်စေသည့် စောစီးစွာတွေ့ရသော လက္ခဏာတစ်ခု ဖြစ်နိုင်သည်။

၂။ အန်ခြင်း

     အထူးသဖြင့် နံနက်ပိုင်းတွင် မအန်ဖူးဘဲ စတင်အန်လာပါက ဆရာဝန်နှင့် ချက်ချင်းပြသသင့်ပါသည်။ ဒါဟာ သာမန် စိတ်ဖိစီးမှုကြောင့် မဟုတ်ဘဲ ဦးနှောက်ပုံမှန်မဟုတ်သည့် အရေးကြီးသော လက္ခဏာတစ်ခု ဖြစ်နိုင်သည်။

၃။ လှုပ်ရှားမှု သို့မဟုတ် ဆက်သွယ်ပြောဆိုမှု ပုံမှန်မဟုတ်ခြင်း

     အကျိတ်သည် သက်ဆိုင်ရာ လုပ်ဆောင်ချက်များကို ထိန်းချုပ်သည့် ဦးနှောက်အပိုင်းကို ဖိမိခြင်း သို့မဟုတ် တွန်းထုတ်လိုက်ခြင်းကြောင့် ဤပြဿနာများ ဖြစ်ပွားရခြင်းဖြစ်သည်။ လက္ခဏာများသည် အကျိတ်တည်ရှိရာနေရာပေါ် မူတည်၍ ကွဲပြားသည်။ ဥပမာအားဖြင့် စကားမပြောနိုင်ခြင်း၊ ခြေလက်များ အားနည်းခြင်း သို့မဟုတ် ထုံကျင်ခြင်း၊ ဟန်ချက်ထိန်းရခက်ခဲခြင်း သို့မဟုတ် ပထမဆုံးအကြိမ် တက်ခြင်းများ ဖြစ်ပွားနိုင်သည်။

ဦးနှောက်ကျိတ် - ဖြစ်ပွားရသည့် အကြောင်းအရင်းကို တိကျစွာ မသိရသေးပါ

     ဦးနှောက်ကျိတ်ဖြစ်ပွားရသည့် တိကျသော အကြောင်းအရင်းကို မသိရသေးဘဲ လက္ခဏာများမှာ ရုတ်တရက် ပေါ်လာနိုင်သောကြောင့် တိကျသော ရောဂါရှာဖွေနိုင်ရန် ဆရာဝန်နှင့် ပြသရန် အလွန်အရေးကြီးပါသည်။ သံလိုက်ဓာတ်မှန် (MRI) ရိုက်ကူးခြင်းဖြင့် အကျိတ် သို့မဟုတ် အခြားပုံမှန်မဟုတ်သည့် အခြေအနေများ ရှိမရှိနှင့် အကျိတ်၏ အရွယ်အစားကို ရှင်းလင်းစွာ တွေ့မြင်နိုင်သောကြောင့် ဆရာဝန်များအနေဖြင့် ထိရောက်သော ကုသမှုအစီအစဉ်ကို ရေးဆွဲနိုင်မည်ဖြစ်သည်။

ဦးနှောက်ကျိတ်ကြောင့်ဖြစ်သော နာတာရှည် ခေါင်းကိုက်ခြင်းကို ကုသခြင်း

အကယ်၍ အကျိတ်သည် ဦးနှောက်အတွင်း အရည်စီးဆင်းမှုကို ပိတ်ဆို့နေပါက ဆရာဝန်သည် အောက်ပါ ကုသမှုနည်းလမ်း (၃) ခုအနက်မှ တစ်ခုကို အသုံးပြုနိုင်သည် -

• ဓါတ်ရောင်ခြည်ဖြင့် ကုသခြင်း (Radiation therapy)
• ကင်ဆာဆေးဖြင့် ကုသခြင်း (Chemotherapy)
• ခွဲစိတ်ကုသခြင်း (Surgery)

ဆရာဝန်သည် လူနာ၏ လက္ခဏာများ၊ အကျိတ်တည်ရှိရာ နေရာနှင့် အရွယ်အစားပေါ် မူတည်၍ အသင့်တော်ဆုံး ကုသမှုကို ရွေးချယ်ပေးမည် ဖြစ်ပါသည်။