ရေဓာတ်ခမ်းခြောက်ခြင်းက လူတိုင်းဖြစ်နိုင်ပါတယ်။ ဒီရက်ပိုင်း ရေသောက်နည်းနေပါသလား။

     ကျွန်ုပ်တို့၏ အလုပ်ရှုပ်သော နေ့စဉ်လူနေမှုဘဝကြောင့် ရေလုံလောက်စွာ သောက်ရန် မေ့လျော့ခြင်း သို့မဟုတ် ရေနည်းနည်းပဲ သောက်မိခြင်းတို့ ဖြစ်တတ်ပြီး ဒါသည် ခန္ဓာကိုယ်၏ လိုအပ်ချက်အတွက် မလုံလောက်နိုင်ပါ။ ရေနည်းနည်းပဲ သောက်ပါက ခန္ဓာကိုယ်ကို ဆိုးကျိုးများစွာ ဖြစ်ပေါ်စေနိုင်သည်။ ခန္ဓာကိုယ်၌ ရေဓာတ်ခမ်းခြောက်နိုင်ပြီး ဆီးအိမ်ရောင်ခြင်း သို့မဟုတ် ကျောက်ကပ်ရောင်ခြင်းကဲ့သို့ ပြင်းထန်သော ရောဂါများကိုလည်း ဖြစ်ပွားစေနိုင်သည်။

ရေဓာတ်ခမ်းခြောက်ခြင်း၏ လက္ခဏာ ၆ ချက်

ကျွန်ုပ်တို့၏ ခန္ဓာကိုယ်သည် ထိရောက်စွာ လုပ်ဆောင်နိုင်ရန် ရေဓာတ်လိုအပ်ပါသည်။ ရေလုံလောက်စွာ မသောက်ပါက ခန္ဓာကိုယ်မှ ရေဓာတ်ပြန်လည်ဖြည့်တင်းရန် လိုအပ်ကြောင်း အောက်ပါလက္ခဏာများမှတစ်ဆင့် အချက်ပြပေးပါသည်-

၁။  ရေဆာခြင်း

     ခံတွင်း၌ တံတွေးနည်းပါးခြင်းဖြင့် သိသာသော ပင်မလက္ခဏာဖြစ်သည်။ ရေသောက်နေစဉ်တွင်ပင် ခန္ဓာကိုယ်က မလုံလောက်သေးကြောင်း အချက်ပြနိုင်ပြီး ခန္ဓာကိုယ်တွင်း အရည်ဓာတ် ပုံမှန်ပြန်မရောက်မချင်း ရေဆာပြေမည်မဟုတ်ပါ (အချို့အခါ၌ ရေ ၂-၃ ဖန်ခွက်အထိ သောက်ရန်လိုအပ်သည်)။

၂။  ခံတွင်းခြောက်သွေ့ခြင်း

     နှုတ်ခမ်းနီနှင့် ဓာတ်မအာရုံခံနိုင်ခြင်းအပြင် မကြာခဏ ခံတွင်းခြောက်သွေ့ခြင်းသည် ရေဓာတ်ခမ်းခြောက်ခြင်း၏ လက္ခဏာတစ်ခု ဖြစ်နိုင်သည်။

၃။  အရေပြားခြောက်သွေ့ခြင်း

     အရွယ်မတိုင်မီ အရေးအကြောင်းများ ပေါ်လာနိုင်သည်။ ပါးစပ်ဘေး၊ မျက်လုံးထောင့်နှင့် နဖူးတို့တွင် အသက်ငယ်ငယ်နှင့် အရေးအကြောင်းများ ပေါ်လာပါက သင့်အသားအရေ၌ စိုစွတ်မှုနည်းပါးပြီး ရေလုံလောက်စွာ မသောက်သုံးကြောင်း ဖော်ပြနေပါသည်။

၄။  မျက်လုံးခြောက်သွေ့ခြင်း

     ရေဓာတ်ခမ်းခြောက်ခြင်းက မျက်ရည်ဂလင်းများကို ခြောက်သွေ့စေပြီး သွေးကြောမျှင်များ ပေါက်ကာ မျက်လုံးနီရဲစေနိုင်သည်ကို လူအများစု သတိမမူမိကြပါ။ ဒါသည် ကွန်တက်လင်း (Contact Lens) တပ်ဆင်သူများအတွက် သာ၍ပင် အန္တရာယ်ရှိပါသည်။

၅။  ဆီးသွားနည်းခြင်း

     ပုံမှန်အားဖြင့် ရေလုံလောက်စွာ သောက်သူသည် တစ်နေ့လျှင် ၄-၇ ကြိမ် ဆီးသွားတတ်ပါသည်။ ဆီးသွားနည်းပြီး ဆီးအရောင် အဝါရင့်ရောင် ဖြစ်နေပါက သင့်ခန္ဓာကိုယ်၌ ရေဓာတ်ခမ်းခြောက်နေပါသည်။ အဆိုးဆုံးအခြေအနေတွင် ဆီးလမ်းကြောင်း ပိုးဝင်ခြင်းကိုလည်း ညွှန်ပြနေနိုင်သည်။

၆။  ဝမ်းချုပ်ခြင်း

     အစာခြေစနစ် လုပ်ဆောင်ချက်အတွက် ရေသည် အလွန်အရေးကြီးပါသည်။ ရေဓာတ်ခမ်းခြောက်ခြင်းသည် အစာခြေစနစ် ပြဿနာများကို ပိုမိုဆိုးရွားစေပြီး ဝမ်းချုပ်ခြင်းကို ဖြစ်ပေါ်စေသည်။ ဟင်းသီးဟင်းရွက် အများအပြား စားသုံးသူများပင်လျှင် ရေနည်းနည်းပဲ သောက်ပါက ဝမ်းချုပ်ခြင်းကို ကြုံတွေ့ရနိုင်သည်။

တစ်နေ့လျှင် ရေမည်မျှ သောက်သင့်သနည်း။

     အထက်ပါ လက္ခဏာများထဲမှ တစ်ခုခုကို ကြုံတွေ့ရပါက သင့်အနေဖြင့် ရေလုံလောက်စွာ မသောက်သုံးမိခြင်း ဖြစ်နိုင်သည်။ ဆရာဝန်များက ရေပိုမိုသောက်သုံးရန် အကြံပြုထားသည်။ တစ်နေ့တာ လိုအပ်သော ရေပမာဏ (မီလီလီတာ) ကို တွက်ချက်ရန် အောက်ပါ ရိုးရှင်းသော ပုံသေနည်းကို အသုံးပြုပါ- သင့်ကိုယ်အလေးချိန် (ကီလိုဂရမ်) ကို ၂.၂ နှင့်မြှောက်၊ ရလဒ်ကို ၂ နှင့်စားပြီး ၃၀ နှင့် ပြန်မြှောက်ပါ။ ယင်းသည် သင့်တစ်နေ့တာ သောက်သုံးရန် လိုအပ်သော ရေပမာဏ (မီလီလီတာ) ဖြစ်သည်။

ဥပမာ-

     သင်၏ ကိုယ်အလေးချိန် ၆၀ ကီလိုဂရမ် ရှိပါက- (၆၀ x ၂.၂ x ၃၀) / ၂ = ၁,၉၈၀ မီလီလီတာ သို့မဟုတ် အကြမ်းအားဖြင့် ၂ လီတာ ဖြစ်သည်။ ၁ လီတာသည် ရေဖန်ခွက် ၅ ခွက်ခန့် ဖြစ်သောကြောင့် သင်သည် တစ်နေ့လျှင် ရေဖန်ခွက် ၁၀ ခွက်ခန့် သောက်ရန် လိုအပ်မည်ဖြစ်သည်။ ရေဓာတ်ခမ်းခြောက်မှုကို ကာကွယ်ရန် သင့်ကိုယ်အလေးချိန်ပေါ် မူတည်၍ တစ်နေ့တာ လိုအပ်သော ရေပမာဏကို တွက်ချက်ပါ။

သောက်သုံးရန် သင့်တော်သော ရေပမာဏသည် တစ်ဦးချင်းစီ၏ ခန္ဓာကိုယ်၊ ရာသီဥတု၊ နေ့စဉ် လှုပ်ရှားဆောင်ရွက်မှုများနှင့် အခြားအချက်များပေါ် မူတည်၍ ကွဲပြားနိုင်သည်ကို သတိပြုပါ။