4D အာထရာဆောင်း - ကိုယ်ဝန်ဆောင်ကာလတစ်လျှောက် သန္ဓေသားကြီးထွားမှုကို ကြည့်ရှုခြင်း

     4D အာထရာဆောင်း ရိုက်ကူးခြင်းသည် သန္ဓေသား၏ ကြီးထွားဖွံ့ဖြိုးမှုနှင့် ခန္ဓာကိုယ်အစိတ်အပိုင်း ပုံမှန်မဟုတ်မှုများကို စောင့်ကြည့်စစ်ဆေးရာတွင် အလွန်အသုံးဝင်ပါသည်။ ထို့အပြင် သန္ဓေသား၏ သွေးကြောအချို့နှင့် သားအိမ်သို့ သွားသော သွေးကြောများကို စစ်ဆေးကြည့်ရှုနိုင်ပြီး ကိုယ်ဝန်ဆိပ်တက်ခြင်း ဖြစ်ပွားနိုင်ခြေကို ကြိုတင်ခန့်မှန်းနိုင်ပါသည်။ 

ကိုယ်ဝန်သက်တမ်း 5 သီတင်းပတ်

     သားအိမ်အတွင်း၌ သန္ဓေအိတ်ငယ်လေးကို အနက်ရောင်အဝိုင်းလေးအဖြစ် စတင်မြင်တွေ့ရသော်လည်း မျက်နှာပုံစံကို ရှင်းလင်းစွာ မမြင်ရသေးပါ။ 

ကိုယ်ဝန်သက်တမ်း 6 သီတင်းပတ်

     သန္ဓေသားသည် သန္ဓေအိတ်အတွင်း၌ ရှိနေပြီး ကလေး၏ နှလုံးခုန်သံကို စတင်မြင်တွေ့နိုင်သည်။ ထို့အပြင် ဆရာဝန်မှ သားအိမ်ပြင်ပ ကိုယ်ဝန်ဆောင်ခြင်း ဟုတ်မဟုတ်ပါ ပူးတွဲစစ်ဆေးပေးမည်ဖြစ်သည်။

ကိုယ်ဝန်သက်တမ်း 7-10 သီတင်းပတ်

     သန္ဓေသား ပိုမိုကြီးထွားလာသည်ကို မြင်တွေ့ရမည်ဖြစ်ပြီး သန္ဓေသားအနီးတွင် အနှစ်အိတ် (Yolk sac) ကိုလည်း တွေ့မြင်နိုင်သည်။

ကိုယ်ဝန်သက်တမ်း 11-14 သီတင်းပတ်

     ဤအဆင့်တွင် သန္ဓေသားကို ပိုမိုရှင်းလင်းစွာ မြင်တွေ့နိုင်ပြီး ဦးခေါင်း၊ ခန္ဓာကိုယ်၊ လက်နှင့် ခြေထောက်များကို သီးခြားစီ ခွဲခြားကြည့်ရှုနိုင်သည်။ အထူးကုဆရာဝန်မှ ကလေး၏ လည်ပင်းအနောက်ဘက် အမျှင်တစ်ရှူးအထူ၊ နှာခေါင်းအရိုး၊ ကျောရိုး၊ အစာအိမ်၊ ဆီးအိမ်နှင့် ဝမ်းဗိုက်နံရံ ပိတ်မပိတ်တို့ကို စစ်ဆေးပေးမည်ဖြစ်သည်။ ထို့အပြင် ကိုယ်ဝန်ဆိပ်တက်ခြင်း ကဲ့သို့သော အခြားဖြစ်နိုင်ခြေများကိုလည်း စစ်ဆေးပေးနိုင်သည်။

ကိုယ်ဝန်သက်တမ်း 16-22 သီတင်းပတ်

     သန္ဓေသား ကြီးထွားလာသည်နှင့်အမျှ ခန္ဓာကိုယ်အစိတ်အပိုင်းများကို ပိုမိုထင်ရှားစွာ မြင်တွေ့ရသည်။ ထို့ကြောင့် ဤကိုယ်ဝန်သက်တမ်းသည် ကလေး၏ ပုံမှန်မဟုတ်မှုများကို စစ်ဆေးရန် အသင့်တော်ဆုံးဖြစ်သည်။ ဤအဆင့်တွင် ခန္ဓာကိုယ်အစိတ်အပိုင်း ပုံမှန်မဟုတ်မှုနီးပါးအားလုံးကို (ဝမ်းဗိုက်နံရံထူခြင်း သို့မဟုတ် ကလေး၏ အနေအထားကန့်သတ်ချက်များမရှိပါက) စစ်ဆေးနိုင်သည့်အပြင် ကျား/မ ခွဲခြားခြင်းနှင့် နှလုံးပုံမှန်မဟုတ်မှုများကိုပါ စစ်ဆေးနိုင်သည်။ ထို့အပြင် အချင်းနိမ့်ခြင်း ရှိမရှိ အချင်းတည်နေရာကိုလည်း စစ်ဆေးသင့်ပါသည်။

ကိုယ်ဝန်သက်တမ်း 22 သီတင်းပတ်နှင့်အထက်

     သန္ဓေသားသည် အဆီများကို ပိုမိုစုဆောင်းလာပြီး လျှင်မြန်စွာ ကြီးထွားလာသည်။ မိဘများအနေဖြင့် 4D အာထရာဆောင်း ရုပ်ပုံများကို ကြည့်ရှုလိုပါက ကိုယ်ဝန်သက်တမ်း 26 - 32 သီတင်းပတ်သည် ကလေး၏ ချစ်စရာပုံရိပ်များကို မြင်တွေ့နိုင်ရန် အကောင်းဆုံးအချိန်ဖြစ်ပြီး ရေမြွှာရည်ပမာဏလည်း အာထရာဆောင်းရိုက်ရန် အသင့်တော်ဆုံးဖြစ်ပါသည်။

ဤကိုယ်ဝန်သက်တမ်းသည် နောက်ပိုင်းတွင် ဖြစ်ပေါ်လာနိုင်သော ကြီးထွားမှုနှင့် ခန္ဓာကိုယ်အစိတ်အပိုင်း ပုံမှန်မဟုတ်မှုများ (ဥပမာ - ရင်ဝမ်းခြားကြွက်သား ပေါက်ခြင်း၊ အဆုတ်ရေအိတ်တည်ခြင်း၊ ကျောက်ကပ်ရောင်ခြင်း သို့မဟုတ် အူပိတ်ခြင်း စသည်) ကို စောင့်ကြည့်စစ်ဆေးရာတွင်လည်း အသုံးဝင်ပါသည်။

4D အာထရာဆောင်း ရိုက်ကူးလိုသော မိဘများအတွက် အကြံပြုချက်များ

• အာထရာဆောင်း မရိုက်မီ 1 သီတင်းပတ်အလိုတွင် သောက်ရေသန့်ကို တစ်ရက်လျှင် အနည်းဆုံး 2 လီတာ များများသောက်ပါ။
• တစ်ရက်လျှင် 6-8 နာရီခန့် လုံလောက်စွာ အနားယူပါ။
• ဆရာဝန် အာထရာဆောင်းရိုက်ရန် အနည်းဆုံး 30-45 မိနစ်ခန့် အချိန်ပေးပါ (အကြောင်းမှာ အချို့အချိန်များတွင် ကလေး အနေအထားပြောင်းသည်အထိ စောင့်ဆိုင်းရနိုင်သောကြောင့်ဖြစ်သည်)။

အာထရာဆောင်း ရိုက်ကူးခြင်းသည် သန္ဓေသား၏ ကြီးထွားဖွံ့ဖြိုးမှုနှင့် ဖြစ်ပေါ်လာနိုင်သော ပုံမှန်မဟုတ်မှုများကို စောင့်ကြည့်စစ်ဆေးရာတွင် အလွန်အသုံးဝင်ပါသည်။

နောက်ဆုံးပြင်ဆင်သည့်ရက်စွဲ

22/07/2020