နှလုံးခုန်နှုန်း စောင့်ကြည့်ရေးစနစ် - အနီးအဝေး မရွေး နှလုံးခုန်သံကို သိရှိနိုင်သည်

     မိမိတို့တွင် ခံစားနေရသော ပုံမှန်မဟုတ်သည့် လက္ခဏာများသည် မမှန်သော နှလုံးခုန်နှုန်း (Arrhythmia) ဟုတ်မဟုတ် အတည်ပြုနိုင်ရန်နှင့် ဟုတ်ပါက မည်သည့် အမျိုးအစားဖြစ်သည်ကို ခွဲခြားသိရှိနိုင်ရန်မှာ အလွန်အရေးကြီးပါသည်။ ထို့ကြောင့် ရောဂါလက္ခဏာဖြစ်ပေါ်ချိန်တွင် မမှန်သော နှလုံးခုန်နှုန်းကို ရောဂါရှာဖွေနိုင်ရေးအတွက် နှလုံးခုန်နှုန်းကို အချိန်ပြည့် စောင့်ကြည့်သည့် စနစ်ရှိနေခြင်းသည် အဓိက သော့ချက်ဖြစ်ပါသည်။

မမှန်သော နှလုံးခုန်နှုန်း ရောဂါ၏ သဘောသဘာဝကို နားလည်ခြင်း

     မမှန်သော နှလုံးခုန်နှုန်း ရောဂါသည် အမျိုးအစား ဆယ်ဂဏန်းမက ရှိပြီး အမျိုးအစားတစ်ခုစီတွင် ဖြစ်ပွားရသည့် အကြောင်းရင်း၊ ရောဂါလက္ခဏာ၊ ပြင်းထန်မှုနှင့် ကုသပုံနည်းလမ်းများ မတူညီကြပါ။ အချို့အမျိုးအစားများတွင် မည်သည့်လက္ခဏာမှ မပြဘဲ ကျန်းမာရေး စစ်ဆေးချိန် သို့မဟုတ် အခြားရောဂါကြောင့် ဆေးရုံသို့ လာရောက်ချိန်မှသာ သိရှိရပြီး၊ အချို့မှာ နှလုံးတုန်ခြင်းကိုသာ ဖြစ်စေကာ စိတ်အနှောင့်အယှက် ဖြစ်စေပါသည်။ ပိုမိုပြင်းထန်သော အမျိုးအစားများသည် မောပန်းလွယ်ခြင်း၊ ခေါင်းမူးခြင်း၊ မေ့လဲခြင်း၊ သတိလစ်ခြင်းနှင့် ရုတ်တရက် နှလုံးရပ်တန့်ခြင်းတို့ကိုပင် ဖြစ်ပေါ်စေနိုင်ပါသည်။

ဆရာဝန်ထံသို့ အချက်အလက်များ တိုက်ရိုက်ပေးပို့နိုင်သော အဝေးမှ နှလုံးခုန်နှုန်း စောင့်ကြည့်စနစ်

     နည်းပညာ တိုးတက်လာမှုကြောင့် Remote Heart Rhythm Monitoring ဟုခေါ်သော အဝေးမှ နှလုံးခုန်နှုန်း စောင့်ကြည့်စနစ် ပေါ်ပေါက်လာခဲ့ပါသည်။ ၎င်းစနစ်သည် ရောဂါလက္ခဏာ ဖြစ်ပေါ်ချိန်တွင် မှတ်တမ်းတင်ထားသော ECG အချက်အလက်များကို လူနာယူဆောင်ထားသည့် လက်ကိုင်ဖုန်း အပလီကေးရှင်းမှတစ်ဆင့် ကလောက်ဒ်စနစ် (Cloud Storage) သို့ ပေးပို့ပေးပါသည်။ ထို့ကြောင့် ဆရာဝန်များသည် ကလောက်ဒ်ပေါ်တွင် သိမ်းဆည်းထားသော အချက်အလက်များကို အချိန်မရွေး၊ နေရာမရွေး ကြည့်ရှုနိုင်ပြီး လူနာမှ ဆေးရုံသို့ လာရောက်ရန် မလိုဘဲ မမှန်သော နှလုံးခုန်နှုန်း ရောဂါကို လျင်မြန်စွာ ရောဂါရှာဖွေပေးနိုင်ပါသည်။

အဝေးမှ နှလုံးခုန်နှုန်း စောင့်ကြည့်စနစ်သည် မည်သည့် အခြေအနေများနှင့် သင့်တော်သနည်း။

ဖြစ်ပွားမှု နည်းပါးခြင်း၊ အချိန်တိုအတွင်းသာ ဖြစ်ပွားခြင်း သို့မဟုတ် အခြားသော စစ်ဆေးမှု နည်းလမ်းများဖြင့် မမှန်သော နှလုံးခုန်နှုန်းကို မရှာဖွေနိုင်သည့် မေ့လဲတတ်သော မမှန်သော နှလုံးခုန်နှုန်း ရောဂါလူနာများ။

၁။  နှလုံးအပေါ်ခန်း ခုန်နှုန်းမြန်ရောဂါ ဖြစ်ပွားနိုင်ခြေရှိသူများ

     သက်ကြီးရွယ်အိုများတွင် အဖြစ်များပြီး ဦးနှောက်သွေးကြော ပိတ်ဆို့မှုရောဂါကို ဖြစ်စေသည့် အဓိကအကြောင်းရင်းဖြစ်သော နှလုံးအပေါ်ခန်း ခုန်နှုန်းမြန်ရောဂါ (Atrial Fibrillation, AF) ဖြစ်ပွားနိုင်ခြေ မြင့်မားသည့် မမှန်သော နှလုံးခုန်နှုန်း ရောဂါလူနာများ။ ရောဂါဖြစ်ပွားနိုင်ခြေ မြင့်မားသော လူနာများတွင် ECG စစ်ဆေးမှုကို နေ့စဉ် အစဉ်မပြတ် ပြုလုပ်ပေးခြင်းဖြင့် နှလုံးအပေါ်ခန်း ခုန်နှုန်းမြန်ရောဂါကို ပိုမိုတွေ့ရှိနိုင်ပြီး ဦးနှောက်သွေးကြော မပိတ်ဆို့မီ ကြိုတင်ကုသမှု ပေးနိုင်ပါသည်။

၂။  ဦးနှောက်သွေးကြော ပိတ်ဆို့မှုရောဂါ ခံစားနေရသူများ

အကြောင်းရင်း မသိရဘဲ ဦးနှောက်သွေးကြော ပိတ်ဆို့မှုရောဂါ ခံစားနေရသော လူနာများ။ ထိုလူနာ အချို့တွင် ဖြစ်ပွားရသည့် အကြောင်းရင်းမှာ နှလုံးခုန်နှုန်း မြန်ခြင်းကြောင့်ဖြစ်သော်လည်း စတင်ဖြစ်ပွားချိန်တွင် စစ်ဆေးမတွေ့ရှိနိုင်သဖြင့် သင့်တော်သော ကုသမှုကို မရရှိဘဲ သွေးကြော ထပ်မံပိတ်ဆို့မှုများ ဖြစ်ပွားနိုင်ပါသည်။ ECG စစ်ဆေးမှုကို ပိုမိုမကြာခဏနှင့် အချိန်ပိုပေး၍ စစ်ဆေးခြင်းက ရောဂါရှာဖွေရာတွင် ပိုမိုကူညီပေးနိုင်ပါသည်။

၃။  ထည့်သွင်းကုသထားသော စက်ပစ္စည်းများဖြင့် ကုသမှုခံယူနေသည့် မမှန်သော နှလုံးခုန်နှုန်း ရောဂါလူနာများ

     နှလုံးခုန်စက် သို့မဟုတ် နှလုံးခုန်နှုန်း ထိန်းစက်များ ထည့်သွင်းထားသော လူနာများသည် ၃ လမှ ၆ လတစ်ကြိမ် စက်၏ လုပ်ဆောင်ချက်များကို စစ်ဆေးရန် ဆေးရုံသို့ လာရောက်ရသည့် ဝန်ထုပ်ဝန်ပိုးရှိပါသည်။ ထို့ကြောင့် နယ်ဝေး သို့မဟုတ် ပြည်ပတွင် နေထိုင်သူများ၊ သက်ကြီးရွယ်အိုများနှင့် သွားလာရ ခက်ခဲသူများအတွက် အဆင်မပြေမှုများ ရှိနေပါသည်။

အနှစ်ချုပ်

     ဤနည်းပညာ၏ တိုးတက်မှုသည် လူနာများ ဆေးရုံသို့ လာရောက်ရန် မလိုဘဲ ထိုစက်ပစ္စည်းများ၏ လုပ်ဆောင်ချက်များကို ဆရာဝန်များ အဝေးမှ စစ်ဆေးနိုင်ရန် ကူညီပေးမည်ဖြစ်ပါသည်။ ယနေ့တွင် အဝေးမှ နှလုံးခုန်နှုန်း စောင့်ကြည့်ရေး ဝန်ဆောင်မှုများကို စတင်ပေးအပ်နေပြီဖြစ်ပြီး ဆရာဝန်က လူနာတစ်ဦးစီ၏ ရောဂါနှင့် သင့်တော်သော စစ်ဆေးရေး ကိရိယာကို ရွေးချယ်ပေးမည်ဖြစ်ပါသည်။

ဤစနစ်သည် ဆရာဝန်များအနေဖြင့် မမှန်သော နှလုံးခုန်နှုန်း ရောဂါလူနာများကို ပိုမိုကောင်းမွန်၊ ပိုမိုအဆင်ပြေ၊ ပိုမိုထိရောက်စွာ ပြုစုစောင့်ရှောက်နိုင်ရန် ကူညီပေးမည်ဖြစ်ပြီး လူနာများ ဆေးရုံသို့ လာရောက်ရသည့် အကြိမ်အရေအတွက်ကို လျှော့ချပေးနိုင်မည် ဖြစ်ပါသည်။

ဆက်လက်ဖတ်ရှုရန်- မမှန်သော နှလုံးခုန်နှုန်း ရောဂါသည် မည်သည့်အကြောင်းရင်းများ ကြောင့်ဖြစ်ပွားသနည်း၊ အပျောက်ကုသနိုင်ပါသလား