ကလေးများ တက်ခြင်းရောဂါ ဖြစ်လာပါက မည်သို့ရင်ဆိုင်ဖြေရှင်းမည်နည်း

ကလေးများတွင် ဖြစ်ပွားသော ဝက်ရူးပြန်ရောဂါအကြောင်း လေ့လာစရာ

     ဝက်ရူးပြန်ရောဂါ သည် ဦးနှောက်ဆဲလ်များ မူမမှန် လှုပ်ရှားမှုကြောင့် ဖြစ်ပွားသည့် အာရုံကြောဆိုင်ရာ ရောဂါတစ်မျိုးဖြစ်ပြီး ပုံစံအမျိုးမျိုးဖြင့် တက်ခြင်းကို ဖြစ်စေသည်။ ရောဂါလက္ခဏာများသည် ဦးနှောက်၏ မည်သည့်အပိုင်း ထိခိုက်မှုရှိသည်အပေါ် မူတည်၍ ကွဲပြားသည်။

ကလေးများတွင် ဝက်ရူးပြန်ရောဂါ၏ ရောဂါလက္ခဏာများ

ကလေးများတွင် ဝက်ရူးပြန်ရောဂါသည် ပုံစံအမျိုးမျိုးဖြင့် ပြသနိုင်သည်။ သင်၏ကလေးတွင် အောက်ပါလက္ခဏာများ ခံစားရပါက ကလေးအာရုံကြောအထူးကုဆရာဝန်နှင့် ချက်ချင်းပြသဆေးကုသမှု ခံယူရန် အရေးကြီးသည်-

• တောင့်တင်းခြင်း၊ တွန့်လိမ်တက်ခြင်း သို့မဟုတ် နှစ်မျိုးလုံး ဖြစ်ပွားခြင်း (Tonic, Clonic, Tonic-Clonic seizures)
• မကြာခဏ ရုတ်တရက် ကြွက်သားများ တုန်လှုပ်တက်ခြင်း (Myoclonic seizures)
• အထူးသဖြင့် အိပ်ရာနိုးစတွင် ရုတ်တရက် ကြွက်သားများ ရှုံ့တွတက်ခြင်း (Epileptic spasms)
• ကြွက်သားအားအင် ရုတ်တရက် လျော့နည်းသွားပြီး လဲကျခြင်း (Atonic seizures)
• ထိန်းချုပ်မရသော ကြွက်သားကျုံ့ခြင်းကြောင့် ခေါင်း သို့မဟုတ် မျက်နှာ အလိုအလျောက် လှည့်သွားခြင်း
• ရုတ်တရက် ငိုင်ကြည့်နေခြင်း (Absence seizures)၊ အချို့တွင် နှုတ်ခမ်းစုပ်ခြင်း သို့မဟုတ် လက်အမူအရာများ ထပ်ခါတလဲလဲ ပြုလုပ်ခြင်းများ ပါဝင်နိုင်သည်
• အကြောင်းရင်းမရှိဘဲ ရယ်မောခြင်း သို့မဟုတ် ငိုကြွေးခြင်း (Gelastic and Dacrystic seizures)
• ဖွံ့ဖြိုးတိုးတက်မှု နောက်ပြန်ဆုတ်သွားခြင်း

ဝက်ရူးပြန်ရောဂါဖြစ်ပွားရသည့် အကြောင်းရင်းများ

ဝက်ရူးပြန်ရောဂါသည် အောက်ပါအကြောင်းရင်း အမျိုးမျိုးကြောင့် ဖြစ်ပွားနိုင်သည်-

• မွေးရာပါ ဦးနှောက်တည်ဆောက်ပုံ မူမမှန်ခြင်းများ
• မွေးဖွားစဉ် အောက်ဆီဂျင်ပြတ်လပ်ခြင်းကဲ့သို့သော နောက်ဆက်တွဲပြဿနာများ
• ပိုးဝင်ခြင်း သို့မဟုတ် ကိုယ်ခံအားစနစ် မူမမှန်မှုကြောင့် ဦးနှောက်ရောင်ရမ်းခြင်း (Autoimmune encephalitis)
• ဦးနှောက်အကျိတ်များ
• ဦးနှောက်သွေးကြောဆိုင်ရာရောဂါ (Stroke)
• မျိုးရိုးလိုက်ခြင်း

အချို့အခြေအနေများတွင် တိကျသောအကြောင်းရင်းကို ရှာမတွေ့နိုင်ပါ။ သို့သော် သင့်တော်သော ရောဂါထိန်းချုပ်မှုအတွက် မှန်မှန်စောင့်ကြည့်ခြင်းနှင့် ဆေးကုသမှု ခံယူခြင်းတို့သည် အလွန်အရေးကြီးပါသည်။

ကလေးများတွင် ဝက်ရူးပြန်ရောဂါအား ရောဂါရှာဖွေခြင်း

     ဝက်ရူးပြန်ရောဂါကို ရောဂါရှာဖွေရာတွင် အရေးကြီးဆုံးအဆင့်မှာ အသေးစိတ် ရောဂါရာဇဝင်ကို ရယူခြင်းဖြစ်သည်။ မူမမှန်သော အမူအရာများကို သတိပြုမိပါက မိဘများအနေဖြင့် တက်နေသည့်အချိန်ကို ဗီဒီယိုတို ရိုက်ကူးထားသင့်ပြီး၊ ထိုဗီဒီယိုသည် ကလေးအာရုံကြောအထူးကုဆရာဝန်များအတွက် ပိုမိုတိကျစွာ ရောဂါရှာဖွေနိုင်ရန် ကူညီပေးနိုင်သည်။ ဝက်ရူးပြန်ရောဂါဟု သံသယရှိပါက ဦးနှောက်လျှပ်စစ်လှိုင်း လှုပ်ရှားမှုကို တိုင်းတာရန် ဦးနှောက်လျှပ်စစ်လှိုင်းစစ်ဆေးခြင်း (EEG) ကို ပြုလုပ်သည်။

ဦးနှောက်လျှပ်စစ်လှိုင်း စစ်ဆေးခြင်း (EEG)

     EEG စစ်ဆေးမှုတွင် ဦးခေါင်းခွံပေါ်၌ အာရုံခံကိရိယာများ တပ်ဆင်၍ ဦးနှောက်အတွင်း လျှပ်စစ်စီးဆင်းမှုကို တိုင်းတာသည်။ ဤလုပ်ဆောင်ချက်သည် နာကျင်မှုမရှိပါ။ ပိုးဝင်ခြင်းဟု သံသယရှိပါက ခါးဆစ်မှ သွေးရည်ကြည်ယူစစ်ဆေးခြင်း (Lumbar puncture) ကို ပြုလုပ်နိုင်သည်။ ထို့အပြင် ဦးနှောက် ပုံမှန်မဟုတ်ခြင်း သို့မဟုတ် အကျိတ်များကို သံသယရှိပါက CT scan သို့မဟုတ် MRI ရိုက်ကူးရန် အကြံပြုနိုင်ပါသည်။

ဝက်ရူးပြန်ရောဂါ ကုသခြင်း

     ဝက်ရူးပြန်ရောဂါအတွက် အဓိကကုသမှုမှာ အတက်သက်သာဆေးများ သောက်သုံးခြင်းဖြစ်ပြီး အရင်းခံအကြောင်းရင်းကိုပါ တွဲဖက်ကုသလေ့ရှိသည်။ ဥပမာအားဖြင့် ဦးနှောက်အကျိတ်ဖြစ်ပွားပါက ခွဲစိတ်မှု၊ ဓာတ်ရောင်ခြည်ကုသမှု သို့မဟုတ် ကီမိုဆေးသွင်းကုသမှုများ လိုအပ်နိုင်သည်။ ဆေးဝါးများ မှန်ကန်စွာ သောက်သုံးသော်လည်း တက်ခြင်း ဆက်လက်ဖြစ်ပွားနေပါက (ဆေးယဉ်ပါး ဝက်ရူးပြန်ရောဂါ) ခွဲစိတ်ကုသခြင်း သို့မဟုတ် Ketogenic diet (ဆီနှင့်အဆီဓာတ်ပါသော အစားအစာ) ဖြင့် ကုသခြင်းကဲ့သို့သော အခြားနည်းလမ်းများကို ထည့်သွင်းစဉ်းစားနိုင်သည်။

သင့်ကလေး တက်လာပါက ပြုလုပ်ရန် နည်းလမ်းများ

• တည်ငြိမ်စွာနေပါ – ထိတ်လန့်ခြောက်ခြားခြင်း မဖြစ်ပါစေနှင့်။
• ဘေးကင်းလုံခြုံမှုရှိအောင် ဆောင်ရွက်ပါ – လိုအပ်ပါက ကလေးကို ဘေးကင်းသောနေရာသို့ ရွှေ့ပြောင်းပါ။
• ကလေးကို ဘေးစောင်း အိပ်စေပါ – ၎င်းသည် သလဲမသီး ဖြစ်ခြင်းမှ ကာကွယ်ပေးပါသည်။
• ကလေးပါးစပ်ထဲသို့ မည်သည့်အရာမှ မထည့်ပါနှင့် – ပါးစပ်ထဲသို့ ပစ္စည်းများ ထည့်ခြင်းသည် လေပြွန်ကို ပိတ်ဆို့စေပြီး အသက်ရှူကျပ်စေနိုင်သည်။ ကလေး သတိအပြည့်အဝ မရမချင်း ဆေး သို့မဟုတ် အရည်များ တိုက်ကျွေးခြင်း မပြုပါနှင့်။
• ချက်ချင်း ဆေးကုသမှု ခံယူပါ – ကလေးများတွင် ဖြစ်ပွားသော တက်ခြင်းအများစုသည် ၅ မိနစ်အတွင်း အလိုအလျောက် သက်သာသွားလေ့ရှိသည်။ သို့သော် တက်ချိန် ၅ မိနစ်ထက် ကျော်လွန်ပါက ဆေးကုသမှုမပါဘဲ ရပ်တန့်ရန် ခက်ခဲနိုင်ပြီး ကလေး၏ ဖွံ့ဖြိုးမှုနှင့် သင်ယူမှုစွမ်းရည်များကို ထိခိုက်စေနိုင်သည်။

သင့်ကလေးတွင် ဝက်ရူးပြန်ရောဂါဟု သံသယရှိသော ရောဂါလက္ခဏာများ ပြသပါက တိကျသော ရောဂါရှာဖွေမှုနှင့် ကုသမှုအတွက် ကလေးအာရုံကြောအထူးကုဆရာဝန်နှင့် ချက်ချင်း တိုင်ပင်ဆွေးနွေးပါ။ သင့်တော်သော အတက်ရောဂါ ထိန်းချုပ်မှုသည် ဖွံ့ဖြိုးတိုးတက်မှုနှင့် သင်ယူမှုအပေါ် ရေရှည်သက်ရောက်မှုများကို ကာကွယ်ပေးနိုင်ပါသည်။