ခဏခဏ ကြို့ထိုးခြင်း - စိတ်ရှုပ်စရာ မကဘဲ ရောဂါလက္ခဏာ ဖြစ်နိုင်

     "ကြို့ထိုးခြင်း" ဆိုသည်မှာ မကြာခဏ ဖြစ်ပွားလေ့ရှိသော အခြေအနေတစ်ခုဖြစ်ပြီး မည်သူမဆို ဖြစ်ပွားနိုင်သည်။ ပုံမှန်အားဖြင့် ကြို့ထိုးခြင်းသည် မိနစ်အနည်းငယ်အတွင်း အလိုအလျောက် ပျောက်ကွယ်သွားလေ့ရှိသော်လည်း နာရီဝက် သို့မဟုတ် ရက်ပေါင်းများစွာ ဆက်တိုက်ဖြစ်ပေါ်နေပါက အခံရောဂါတစ်ခုခုကြောင့် ဖြစ်ပွားခြင်း ရှိမရှိ စစ်ဆေးရန် လိုအပ်နိုင်သည် (အထူးသဖြင့် အိပ်ပျော်နေစဉ် ကြို့ထိုးပါက ပိုမိုဂရုစိုက်ရန် လိုအပ်ပါသည်)။

ကြို့ထိုးခြင်းဆိုသည်မှာ

     ကြို့ထိုးခြင်းသည် အစာအိမ် ယားယံပြီး ပုံမှန်မဟုတ်ဘဲ အလုပ်လုပ်ခြင်းကြောင့် ရင်ဝမ်းခြားကြွက်သား (Diaphragm) ရုတ်တရက် ရှုံ့တွသွားခြင်းဖြစ်သည်။ ထိုသို့ ရှုံ့တွမှုကြောင့် လေကို လျှင်မြန်စွာ ရှူသွင်းမိသော်လည်း ဝင်ရောက်လာသော လေသည် အသံအိုး ကြွက်သားများဖြင့် ပိတ်ဆို့သွားကာ ပုံမှန်အသံထွက်ပေါ်သည့် "ကြို့" ဆိုသော အသံ ဖြစ်ပေါ်လာခြင်းဖြစ်သည်။

ကြို့ထိုးရသည့် အကြောင်းအရင်းများ

     ကြို့ထိုးခြင်းသည် လည်ပင်းနှင့် ရင်ဘတ်ဧရိယာရှိ ပုံမှန်မဟုတ်သော အခြေအနေများ (ဥပမာ - အကျိတ် သို့မဟုတ် ပြန်ရည်ကျိတ် ရောင်ရမ်းခြင်း) ကြောင့် ဖြစ်ပွားနိုင်သည်။ ထို့အပြင် ဝမ်းဗိုက်ပိုင်း ပုံမှန်မဟုတ်မှုများဖြစ်သော ဝမ်းဗိုက်မြှေးရောင်ခြင်း၊ ကျောက်ကပ်ပျက်စီးခြင်း သို့မဟုတ် ခွဲစိတ်ကုသမှုအပြီး ခံစားရသော လက္ခဏာများကြောင့်လည်း ဖြစ်ပွားနိုင်သည်။ ရုတ်တရက် လန့်သွားခြင်း သို့မဟုတ် နာတာရှည် စိတ်ဖိစီးမှုကဲ့သို့သော စိတ်ခံစားမှု အပြောင်းအလဲများကြောင့်လည်း ဖြစ်ပွားနိုင်သည်။ ထို့အပြင် ဘီယာ၊ ဆိုဒါကဲ့သို့သော အကာဗွန်ဒိုင်အောက်ဆိုက်ပါဝင်သော အဖျော်ယမကာများ သောက်သုံးခြင်း၊ အစားအလွန်အမင်း စားသုံးခြင်း (အထူးသဖြင့် အစပ်အစားအစာများ) သို့မဟုတ် ဆေးလိပ်အလွန်အမင်း သောက်သုံးခြင်းတို့ကြောင့်လည်း ကြို့ထိုးခြင်းကို ဖြစ်ပေါ်စေနိုင်သည်။

ကြို့ထိုးခြင်းသည် ဖြစ်ခဲပြီး ကြာရှည်မခံဘဲ အလိုအလျောက် ပျောက်ကွယ်သွားလေ့ရှိသော်လည်း ဖြစ်ပွားနေစဉ်အတွင်း စိတ်အနှောင့်အယှက်ဖြစ်စေရုံမက Professional မဆန်သော ပုံရိပ်ကိုလည်း ဖြစ်ပေါ်စေနိုင်သည်။

ကြို့ထိုးခြင်း ပျောက်ကင်းစေမည့် နည်းလမ်းများ

၁။ စက္ကူအိတ်ထဲသို့ လေရှူသွင်း/ရှူထုတ်ခြင်း

     စက္ကူအိတ် သို့မဟုတ် ပလတ်စတစ်အိတ်ကို အသုံးပြု၍ ပါးစပ်နှင့် နှာခေါင်းကို အုပ်ထားပါ။ ထို့နောက် ပိုမိုမအောင့်နိုင်တော့သည်အထိ သို့မဟုတ် ၁ မိနစ်မှ ၂ မိနစ်ခန့်အထိ အိတ်ထဲသို့ တိုတိုနှင့် မြန်မြန် လေရှူသွင်း/ရှူထုတ် ပြုလုပ်ပေးပါ။

၂။ ရေသက်သောက်၍ ကြို့ထိုးခြင်း ခေတ္တရပ်တန့်ခြင်း

     ရေကို ၉ ငုံ ဆက်တိုက် သောက်သုံးပေးပါ သို့မဟုတ် အလွန်အေးသော ရေအေးကို သောက်ကြည့်ပါ။ ကြို့ထိုးခြင်း မပျောက်မချင်း ဆက်တိုက်သောက်ပြီး မျိုချပေးရပါမည်။

၃။ အချဉ်ဓာတ်ရှိသော အစားအစာများ စားသုံးခြင်း

     အချဉ်ဓာတ်ရှိသော အစားအစာများ (အထူးသဖြင့် သံပုရာသီး) သည် ကြို့ထိုးခြင်းကို သက်သာစေနိုင်ကြောင်း လူအများ မသိကြပါ။ သံပုရာရည် လက်ဖက်ရည်ဇွန်း ၁ ဇွန်းခန့်ကို ညှစ်၍ သောက်သုံးပေးပါ၊ အချဉ်ဓာတ်သည် လျှာပေါ်ရှိ အနံ့အရသာခံ အာရုံကြောများကို လှုံ့ဆော်ပေးပြီး ကြို့ထိုးခြင်းကို မြန်ဆန်စွာ ရပ်တန့်စေနိုင်သည်။

၄။ နားကို ပိတ်ထားခြင်း

     လက်ချောင်းများဖြင့် နားပေါက်ကို စက္ကန့် ၂၀ မှ ၃၀ ခန့် ပိတ်ထားပါ သို့မဟုတ် ပိုက်ဖြင့် ရေသောက်နေစဉ် နားကို ပိတ်ထားပေးပါ။ ဤနည်းလမ်းသည် ရင်ဝမ်းခြားကြွက်သားနှင့် ဆက်စပ်နေသော ဦးနှောက်အာရုံကြောများသို့ အနားယူရန် အချက်ပြမှုကို ပေးပို့ပြီး ကြို့ထိုးခြင်းကို သက်သာစေသည်။

၅။ အသက်ပြင်းပြင်း ရှူသွင်းခြင်း

     ဒါကတော့ အခြေခံအကျဆုံး နည်းလမ်းဖြစ်ပါတယ် - အဆုတ်ထဲသို့ အသက်ကို ပြင်းပြင်းရှူသွင်းပြီး ခေတ္တအောင့်ထားပါ၊ ထို့နောက် ၁၀ စက္ကန့်ခန့် ဖြည်းဖြည်းချင်း အသက်ပြန်ရှူထုတ်ပါ။ ပြီးပါက ရေချက်ချင်း သောက်ပေးပါ။

အကြံပြုချက်

     ကြို့ထိုးခြင်းသည် ရောဂါတစ်ခု မဟုတ်ပါ၊ ၁ ရက် သို့မဟုတ် ၂ ရက် ဆက်တိုက် မဖြစ်ပါက စိုးရိမ်စရာ မလိုပါ။ သို့သော် နာတာရှည် ကြို့ထိုးနေသူများနှင့် အထက်ပါ နည်းလမ်းများဖြင့် မသက်သာပါက အခံရောဂါတစ်ခုခု၏ လက္ခဏာဖြစ်နိုင်သဖြင့် ဆရာဝန်နှင့် သေချာစွာ ပြသစစ်ဆေးရန် အကြံပြုအပ်ပါသည်။

ပြင်ဆင်ပြီးသည့်ရက်စွဲ

03/07/2023