ဆီးမထိန်းနိုင်ခြင်း - မည်သို့ကာကွယ်မည်နည်း။

     ဆီးမထိန်းနိုင်ခြင်းနှင့် ဆီးယိုစိမ့်ခြင်းဆိုသည်မှာ မိမိစိတ်ကြိုက် ဆီးသွားခြင်းကို မထိန်းချုပ်နိုင်သည့် အခြေအနေဖြစ်ပါသည်။ ကိုယ်လက်လှုပ်ရှားစဉ် ဆီးယိုစိမ့်ခြင်း သို့မဟုတ် မရည်ရွယ်ဘဲ ဆီးထွက်ကျခြင်းများ ဖြစ်ပေါ်နိုင်ပါသည်။ ဤပြဿနာသည် သက်ကြီးရွယ်အို အမျိုးသား၊ အမျိုးသမီး နှစ်ဦးစလုံးတွင် အတွေ့ရများပြီး နေ့စဉ်လူနေမှုဘဝနှင့် စိတ်ကျန်းမာရေးကို သိသာစွာ သက်ရောက်မှုရှိစေပါသည်။ 

ဆီးမထိန်းနိုင်ခြင်း၏ အကြောင်းရင်းများ

အသက်အရွယ်ကြီးရင့်လာသည်နှင့်အမျှ ခန္ဓာကိုယ်အစိတ်အပိုင်းအသီးသီးသည် ယိုယွင်းလာပြီး လုပ်ဆောင်ချက်များ လျော့နည်းလာပါသည်။ ထို့အပြင် ရောဂါများ၊ သောက်ဆေးများနှင့် နေထိုင်မှုပုံစံများသည်လည်း ဆီးယိုစိမ့်နိုင်ခြေကို မြင့်တက်စေနိုင်ပါသည်။ အောက်ပါအကြောင်းအရင်းအမျိုးမျိုးကြောင့် သက်ကြီးရွယ်အိုများတွင် ဤပြဿနာနှင့် ရင်ဆိုင်ရခြင်းမှာ ဖြစ်လေ့ရှိသော ကိစ္စဖြစ်ပါသည်-

• ကြွက်သား မူမမှန်ခြင်း- တင်ပါးဆုံကွင်း ကြွက်သားများ အားနည်းသဖြင့် ဆီးထိန်းကြွက်သား ကောင်းစွာမပိတ်နိုင်ခြင်း သို့မဟုတ် ဆီးအိမ်ကြွက်သား လှုပ်ရှားမှု လွန်ကဲခြင်းတို့ ဖြစ်သည်။ ဆီးများပြားလာသောအခါ ဆီးယိုစိမ့်ခြင်းနှင့် ဆီးမထိန်းနိုင်ခြင်းတို့ ဖြစ်ပေါ်စေနိုင်သည်။
• အမျိုးသမီးများတွင် မျိုးပွားအင်္ဂါ ပိုးဝင်ခြင်း သို့မဟုတ် ဆီးလမ်းကြောင်း ပိုးဝင်ခြင်း (UTI)။
• ဆီးသွားခြင်းကို ထိန်းချုပ်သည့် အာရုံကြောများ ပျက်စီးခြင်း- ထိခိုက်ဒဏ်ရာရခြင်း သို့မဟုတ် ဆီးချိုရောဂါ၊ ပါကင်ဆန်ရောဂါ (Parkinson's Disease)၊ Multiple Sclerosis အစရှိသော အခြားရောဂါများကြောင့် ဖြစ်ပွားနိုင်သည်။
• တင်ပါးဆုံတွင်း အင်္ဂါများ ကျွံကျခြင်း- တင်ပါးဆုံကွင်း ကြွက်သားများ အားနည်းမှုကြောင့် သားအိမ်၊ အူနှင့် ဆီးအိမ်တို့ အောက်သို့ လျှောကျခြင်း။
• ဆီးကျိတ်ရောင်ခြင်း၊ ဆီးကျိတ်ကြီးခြင်း သို့မဟုတ် မတော်တဆမှုနှင့် ခွဲစိတ်မှုကြောင့် ဆီးကျိတ်ဧရိယာရှိ အာရုံကြော/ကြွက်သားများ ထိခိုက်ပျက်စီးခြင်း- ဤသည်တို့မှာ သက်ကြီးပိုင်း အမျိုးသားများတွင် ဆီးယိုစိမ့်ရသည့် အဓိကအကြောင်းအရင်းများ ဖြစ်သည်။
• စားသောက်မှု အလေ့အထများ- အချို့သော သောက်စရာများနှင့် ဆေးဝါးများသည် ခန္ဓာကိုယ်အား ဆီးပိုမိုထွက်ရှိစေရန် လှုံ့ဆော်ပေးသဖြင့် မကြာခဏ ဆီးသွားချင်စိတ်ဖြစ်ပေါ်ပြီး ဆီးမထိန်းနိုင်ခြင်းကို ဖြစ်စေသည် (ဥပမာ- အရက်၊ ကဖိန်းဓာတ်၊ အချိုရည်များ၊ အစပ်၊ အချို သို့မဟုတ် အချဉ်လွန်ကဲသော အစားအစာများ)။
• အဝလွန်ခြင်း၊ ဆေးလိပ်သောက်ခြင်း သို့မဟုတ် မိသားစုမျိုးရိုးရှိခြင်း- ဤအချက်များရှိသူများသည် အခြားသူများထက် ဆီးယိုစိမ့်နိုင်ခြေ ပိုမိုမြင့်မားပါသည်။

အထူးသဖြင့် နှလုံးရောဂါ၊ သွေးတိုး၊ ကြွက်သားဖြေလျှော့ဆေး သို့မဟုတ် ဖြည့်စွက်စာ သောက်သုံးနေသော သက်ကြီးရွယ်အိုများသည် ဆီးယိုစိမ့်သည့် ပြဿနာများနှင့် ပတ်သက်၍ ဆရာဝန်နှင့် တိုင်ပင်သင့်ပါသည်၊ အကြောင်းမှာ ၎င်းတို့မှာ ထိုဆေးဝါးများ၏ ဘေးထွက်ဆိုးကျိုးများ ဖြစ်နိုင်သောကြောင့် ဖြစ်သည်။

ဤပြဿနာနှင့် ရင်ဆိုင်နေရသူများအတွက် အကြံပြုချက်များ

၁။ နေထိုင်မှုပုံစံ ပြောင်းလဲခြင်း

အချို့သော အလေ့အထများကို ပြုပြင်ပြောင်းလဲခြင်းဖြင့် ဆီးယိုစိမ့်နိုင်ခြေကို လျှော့ချနိုင်ပါသည်၊ ဥပမာ-

• အဝမလွန်စေရန် ဝိတ်လျှော့ခြင်းနှင့် ကိုယ်အလေးချိန် ထိန်းသိမ်းခြင်း။
• လက်ဖက်ရည်၊ ကော်ဖီ၊ အရက်နှင့် အချိုရည်များကဲ့သို့ မကြာခဏ ဆီးသွားစေသည့် သောက်စရာများကို ရှောင်ကြဉ်ခြင်း။
• ဆေးလိပ်ဖြတ်ခြင်း၊ အရသာစူးရှသော အစားအစာများကို ရှောင်ကြဉ်ခြင်းနှင့် ဆီးအိမ်ပေါ် ဖိအားသက်ရောက်စေသည့် လေးလံသော ပစ္စည်းများ မမခြင်း။

၂။ ဆီးအိမ် လေ့ကျင့်ခန်းလုပ်ခြင်း

     ဆီးမသွားမီ အနည်းငယ် ထိန်းထားသည့် အလေ့အကျင့်ကို လေ့ကျင့်ပါ၊ ပုံမှန် အချိန်ဇယားအတိုင်း သွားနိုင်ရန် ကြိုးစားပါ။ အားစိုက်၍ ညှစ်ထုတ်ခြင်းကို ရှောင်ကြဉ်ပြီး ဆီးအိမ်အတွင်း ဆီးကုန်စင်အောင် သွားပါ။

၃။ တင်ပါးဆုံကွင်းနှင့် ဆီးထိန်းကြွက်သား လေ့ကျင့်ခန်းများ

     အတွေ့ရများသော အကြောင်းရင်းမှာ အသက်အရွယ်ကြောင့် တင်ပါးဆုံကွင်း ကြွက်သားများ သို့မဟုတ် ဆီးထိန်းကြွက်သားများ အားနည်းလာခြင်း ဖြစ်သည်။ ဤလေ့ကျင့်ခန်းများကို ပုံမှန်ပြုလုပ်ပေးခြင်းဖြင့် ပြဿနာကို သက်သာစေနိုင်ပါသည်။

တင်ပါးဆုံကွင်းနှင့် ဆီးထိန်းကြွက်သားများ သန်မာစေခြင်း

၁။ တင်ပါးဆုံကွင်း ကြွက်သား လေ့ကျင့်ခန်း

• ကြမ်းပြင်ပေါ်တွင် အနားယူလျက် ပက်လက်အိပ်ပါ၊ ဒူးနှစ်ဖက်ကို ထောင်ထားပြီး ခြေထောက်ကို ပုခုံးအကျယ်အတိုင်း အနည်းငယ် ခွဲထားပါ။
• တင်ပါးဆုံကွင်း၊ တင်ပါးနှင့် ဝမ်းဗိုက်အောက်ပိုင်း ကြွက်သားများကို ၅ စက္ကန့်မျှ ရှုံ့ထားပါ။
• ၅ စက္ကန့် ပြည့်ပါက ဖြည်းဖြည်းချင်း ဖြေလျှော့ပြီး မူလပုံစံအတိုင်း ပြန်နေပါ။
• ၁ မိနစ်လျှင် ၁ အကြိမ် နှုန်းဖြင့် ပြုလုပ်ပါ။ စုစုပေါင်း ၁၀ ကြိမ် သို့မဟုတ် ၁၀ မိနစ်ခန့် ပြုလုပ်ပေးပါ။

၂။ ဆီးထိန်းကြွက်သား လေ့ကျင့်ခန်း

     ဆီးထိန်းကြွက်သားကို ၅ စက္ကန့်ခန့် ရှုံ့ပေးပြီး ၁၀ စက္ကန့်မျှ ဖြေလျှော့ပေးပါ။ မနက်၊ နေ့လယ်၊ ညနေ ပိုင်းခြား၍ တတ်နိုင်သမျှ အကြိမ်ရေများများ ပြုလုပ်ပါ။ ကြာချိန်ကို တဖြည်းဖြည်း တိုးမြှင့်သွားပါ။ ပုံမှန် လေ့ကျင့်ပေးခြင်းဖြင့် ဆီးမထိန်းနိုင်ခြင်းကို ကာကွယ်ပေးပြီး သက်သာစေနိုင်ပါသည်။
 

ပိုမိုဖတ်ရှုရန်- သံလိုက်လှိုင်း ထိုင်ခုံနည်းပညာဖြင့် ဆီးမထိန်းနိုင်ခြင်းကို ကုသခြင်း

ဆီးမထိန်းနိုင်သည့် ပြဿနာ ပိုမိုဆိုးရွားလာပြီး နေ့စဉ်ဘဝကို ထိခိုက်လာပါက ကုသမှုအတွက် ဆရာဝန်နှင့် တိုင်ပင်ဆွေးနွေးပါ။ ဤသည်မှာ သက်ကြီးရွယ်အိုများအတွက် ကောင်းမွန်သော လူနေမှုဘဝ အရည်အသွေးကို ပြန်လည်ရရှိစေပြီး ပျော်ရွှင်စွာ နေထိုင်နိုင်ရန် ကူညီပေးပါသည်။

Edit

25/08/2023