ဖိစီးမှုနှင့် အိပ်ရေးပျက်ခြင်းကြောင့် ဦးနှောက်သေးငယ်ခြင်း

     အိပ်ရေးမဝခြင်း သို့မဟုတ် နာတာရှည် စိတ်ဖိစီးမှုများခြင်း ကဲ့သို့သော နေ့စဉ် အလေ့အကျင့်များသည် ဦးနှောက်ယိုယွင်းပျက်စီးမှုကို မြန်ဆန်စေနိုင်သည်ကို သင်သိပါသလား။ စိတ်ဖိစီးမှုများပြီး အလုပ်များသော ယနေ့ခေတ်တွင် ဦးနှောက်ကျုံ့ခြင်း (Brain atrophy) သည် မိမိနှင့် အလှမ်းဝေးသော ကိစ္စတစ်ခု မဟုတ်ပါ။

ဦးနှောက်ကျုံ့ခြင်းအကြောင်း နားလည်သဘောပေါက်ခြင်း

     ဦးနှောက်ကျုံ့ခြင်း (Cerebral atrophy) ဆိုသည်မှာ ဦးနှောက်ဆဲလ်များ ယိုယွင်းပျက်စီးပြီး သေဆုံးသွားခြင်းကြောင့် ဦးနှောက်တစ်ရှူး ပမာဏ လျှော့နည်းသွားကာ ဦးနှောက်၏ လုပ်ဆောင်ရည်များ ကျဆင်းသွားခြင်းဖြစ်သည်။ အတွေ့ရများသော ရောဂါလက္ခဏာများမှာ မှတ်ဉာဏ်ချို့ယွင်းခြင်း၊ မေ့လျော့ခြင်း၊ တွေးခေါ်မှု နှေးကွေးခြင်းနှင့် နေ့စဉ်လုပ်ငန်းဆောင်တာများ ဆောင်ရွက်ရာတွင် ခက်ခဲခြင်းတို့ ဖြစ်ကြသည်။ အသက်အရွယ်ကြီးရင့်ခြင်းနှင့် အဓိက သက်ဆိုင်သော်လည်း အခြားသော စွန့်စားရသည့် အကြောင်းအရင်းများကြောင့်လည်း ဦးနှောက်ကျုံ့ခြင်း ဖြစ်ပွားနိုင်သည်။

ဦးနှောက်ကျုံ့ခြင်းကို ဖြစ်စေသော အကြောင်းအရင်းများ

• အသက်အရွယ်ကြီးရင့်ခြင်း- ဦးနှောက်ဆဲလ်များ သဘာဝအတိုင်း ယိုယွင်းပျက်စီးခြင်းကို ဖြစ်စေသည့် အဓိက အကြောင်းအရင်းဖြစ်သည်။
• မျိုးရိုးဗီဇ- အချို့သူများတွင် ဦးနှောက်ကျုံ့ခြင်း ဖြစ်ပွားနိုင်ခြေ မျိုးရိုးဗီဇ ပါလာနိုင်သည်။
• ရောဂါအခံများ ရှိခြင်း- သွေးတိုးရောဂါ၊ ဆီးချိုရောဂါ သို့မဟုတ် လေဖြတ်ခြင်းကဲ့သို့သော ရောဂါများ ဖြစ်သည်။
• ဦးခေါင်း ထိခိုက်ဒဏ်ရာရရှိခြင်း- ပြင်းထန်စွာ ထိခိုက်မိခြင်းသည် ဦးနှောက်ဆဲလ်များကို ပျက်စီးစေနိုင်သည်။
• နေထိုင်မှုပုံစံဆိုင်ရာ စွန့်စားရမှုများ- ဆေးလိပ်သောက်ခြင်း၊ အရက်အလွန်အကျွံသောက်ခြင်း၊ အနားယူမှု မလုံလောက်ခြင်းနှင့် နာတာရှည် စိတ်ဖိစီးမှုများခြင်းတို့ ပါဝင်သည်။

စိတ်ဖိစီးမှုနှင့် အိပ်ရေးပျက်ခြင်းတို့က ဦးနှောက်ကို မည်သို့ထိခိုက်စေသနည်း

• စိတ်ဖိစီးမှု- စိတ်ဖိစီးမှုဟော်မုန်းများကို ထွက်ရှိစေပြီး ဦးနှောက်လုပ်ဆောင်ချက်ကို ထိခိုက်စေကာ မှတ်ဉာဏ်ချို့ယွင်းခြင်းနှင့် စိတ်ဓာတ်ကျရောဂါ ဖြစ်ပွားနိုင်ခြေကို မြင့်မားစေသည်။
• အိပ်ရေးမဝခြင်း- ဦးနှောက်ကို လုံလောက်စွာ အနားမရရှိစေဘဲ သင်ယူမှု၊ မှတ်ဉာဏ်နှင့် ဆုံးဖြတ်ချက်ချနိုင်စွမ်းတို့ကို ထိခိုက်စေသည်။

ဦးနှောက်ကို ဂရုစိုက်စောင့်ရှောက်ခြင်း၏ အရေးပါမှု

     ကျန်းမာသော ဦးနှောက်သည် ခန္ဓာကိုယ်၏ လုပ်ဆောင်ချက်အားလုံးကို ထိန်းချုပ်ရန်အတွက် အလွန်အရေးကြီးပါသည်။ ဦးနှောက်ကျန်းမာရေးကို ထိန်းသိမ်းခြင်းသည် ဘဝအရည်အသွေးကို မြှင့်တင်ပေးခြင်း၊ မှတ်ဉာဏ်နှင့် အာရုံစူးစိုက်မှုကို တိုးတက်စေခြင်း၊ လှုပ်ရှားမှုများတွင် အပြည့်အဝ ပါဝင်နိုင်စေခြင်းတို့အပြင် ခန္ဓာကိုယ်နှင့် ဉာဏ်ရည်ပိုင်းဆိုင်ရာ ယိုယွင်းမှုကို နှောင့်နှေးစေပြီး ဘဝကျေနပ်မှုကို ပိုမိုရရှိစေသည်။

ဦးနှောက်ကျုံ့ခြင်းမှ ကာကွယ်နည်းများ

• ကျန်းမာရေးကို ဦးစားပေးပါ- သွေးတွင်းသကြားဓာတ်၊ သွေးတိုးနှင့် ကိုလက်စထရော ပမာဏများကို ထိန်းသိမ်းပါ။
• မှန်မှန် လေ့ကျင့်ခန်းလုပ်ပါ- ဦးနှောက်သို့ သွေးလှည့်ပတ်မှုကို ကောင်းမွန်စေသည်။
• အာဟာရပြည့်ဝသော အစားအစာများကို စားသုံးပါ- ဟင်းသီးဟင်းရွက်၊ သစ်သီးဝလံ၊ ကောက်နှံတစ်ခုလုံးနှင့် ငါးတို့ကို အဓိကထား စားသုံးပါ။
• လုံလောက်စွာ အနားယူပါ- တစ်ညလျှင် အနည်းဆုံး ၇ နာရီမှ ၈ နာရီအထိ အိပ်စက်ရန် ကြိုးစားပါ။
• စိတ်ဖိစီးမှုကို လျှော့ချပါ- သီချင်းနားထောင်ခြင်း သို့မဟုတ် တရားထိုင်ခြင်းကဲ့သို့သော စိတ်ကို အနားရစေမည့် အလေ့အကျင့်များအတွက် အချိန်ပေးပါ။
• ဦးနှောက်ကို လှုံ့ဆော်ပေးပါ- အသစ်အဆန်းများကို သင်ယူပါ၊ ဉာဏ်စမ်းဂိမ်းများ ဆော့ပါ၊ စာဖတ်ပါ။
• ပုံမှန် ကျန်းမာရေး စစ်ဆေးပါ- ဦးနှောက်ကျန်းမာရေးကို ထိခိုက်စေနိုင်သော အခြေအနေများကို စောစီးစွာ သိရှိကုသနိုင်ရန် နှစ်စဉ် ကျန်းမာရေး စစ်ဆေးမှုများ ပြုလုပ်ပါ။

သင်၌ သံသယဖြစ်ဖွယ် လက္ခဏာများ သို့မဟုတ် ဦးနှောက်ကျုံ့ခြင်းနှင့် ပတ်သက်၍ စိုးရိမ်ပူပန်မှုများ ရှိပါက တိကျသော ရောဂါရှာဖွေခြင်းနှင့် သင့်တော်သော ကုသမှုများ ရရှိနိုင်ရန် ဆရာဝန်နှင့် တိုင်ပင်ဆွေးနွေးပါ။