နှလုံး အီးကို (ECHO) စစ်ဆေးခြင်း အကြောင်း သိကောင်းစရာ

     မှန်ချပ်တစ်ခုသည် ပုံရိပ်ကို ရှင်းလင်းစွာ ရောင်ပြန်ဟပ်ပြသနိုင်သကဲ့သို့ အသံလှိုင်းများသည်လည်း ရောင်ပြန်ဟပ်နိုင်ပါသည်။ မမြင်နိုင်သော အရာများအတွက်ပင် အသံလှိုင်းများသည် ငုပ်လျှိုးနေသော အခြေအနေများကို ဖော်ပြပေးနိုင်ပါသည်။ နှလုံးအာထရာဆောင်း (Echocardiogram) သို့မဟုတ် "ECHO" သည် အသံလှိုင်းများကို အသုံးပြု၍ သင့်နှလုံး၏ အခြေအနေကို အသေးစိတ် ကြည့်ရှုစစ်ဆေးပေးနိုင်သော စွမ်းဆောင်ရည်မြင့် စက်ကိရိယာတစ်ခု ဖြစ်ပါသည်။

နှလုံးအာထရာဆောင်းစစ်ဆေးခြင်း (Echocardiogram)

နှလုံးအာထရာဆောင်း စစ်ဆေးခြင်းသည် ရင်ဘတ်ဆီသို့ ကြိမ်နှုန်းမြင့် အသံလှိုင်းများ လွှတ်ထုတ်၍ စစ်ဆေးခြင်းဖြစ်ပါသည်။ ထိုအသံလှိုင်းများသည် တုံ့ပြန်ရောင်ပြန်ဟပ်ကာ ကွန်ပျူတာဖန်သားပြင်ပေါ်တွင် သင့်နှလုံး၏ အသေးစိတ် ပုံရိပ်များကို ဖန်တီးပေးပါသည်။ နှလုံး၏ လုပ်ဆောင်ချက်များကို ဘက်ပေါင်းစုံမှ အသေးစိတ် သုံးသပ်နိုင်ရန်အတွက် ၎င်းကို နှလုံးလျှပ်စစ်လှိုင်းစစ်ဆေးခြင်း (EKG) နှင့်အတူ တွဲဖက်အသုံးပြုလေ့ရှိပြီး အောက်ပါအချက်များကို စစ်ဆေးပေးနိုင်ပါသည်-

• နှလုံးကြွက်သားများ ညှစ်ထုတ်မှု အခြေအနေ
• နှလုံး၏ အရွယ်အစားနှင့် ပုံသဏ္ဌာန်
• နှလုံးအတွင်း သွေးလှည့်ပတ်စီးဆင်းမှု
• နှလုံးအဆို့ရှင် ပုံမှန်မဟုတ်ခြင်း (ဥပမာ- ကျဉ်းမြောင်းခြင်း သို့မဟုတ် သွေးယိုစိမ့်ခြင်း)
• နှလုံးအတွင်း အကျိတ်များ သို့မဟုတ် ကူးစက်ရောဂါပိုးများ ရှိမရှိ စစ်ဆေးခြင်း

နှလုံးအာထရာဆောင်း စစ်ဆေးခြင်း အမျိုးအစားများ

၁။ ရင်ဘတ်ပေါ်မှ နှလုံးအာထရာဆောင်း ရိုက်ခြင်း (Transthoracic Echocardiogram) 

     ၎င်းသည် အသုံးအများဆုံးနှင့် အခြေခံအကျဆုံး အမျိုးအစားဖြစ်ပြီး ပုံမှန် ကိုယ်ဝန်ဆောင် အာထရာဆောင်းရိုက်ခြင်းနှင့် ဆင်တူပါသည်။ စစ်ဆေးရလွယ်ကူမြန်ဆန်သော်လည်း ရင်ဘတ်ထူသူများ သို့မဟုတ် ရင်ဘတ်ပုံသဏ္ဌာန် ပုံမှန်မဟုတ်သူများအတွက် ပုံရိပ်ကြည့်ရှုရန် ခက်ခဲနိုင်ပါသည်။

၂။ လေ့ကျင့်ခန်းလုပ်စဉ် နှလုံးအာထရာဆောင်း ရိုက်ခြင်း (Stress Echocardiogram)

     ဤစစ်ဆေးမှုသည် လေ့ကျင့်ခန်းလုပ်နေစဉ် နှလုံး၏ လုပ်ဆောင်ချက်ကို တိုင်းတာခြင်းဖြစ်ပြီး နှလုံးပိုမို အလုပ်လုပ်ရချိန်တွင် ပုံမှန်မဟုတ်သော သွေးလှည့်ပတ်မှုများကို ရှာဖွေဖော်ထုတ်ပေးနိုင်ပါသည်။

၃။ အစာပြွန်မှတစ်ဆင့် နှလုံးအာထရာဆောင်း ရိုက်ခြင်း (Transesophageal Echocardiogram)

     ၎င်းသည် အဆင့်မြင့် အာထရာဆောင်း စစ်ဆေးမှုဖြစ်ပြီး မှန်ဘီလူးပါသော ပိုက်ပျော့ကို အစာပြွန်အတွင်းသို့ ထည့်သွင်း၍ စစ်ဆေးခြင်းဖြစ်ပါသည်။ အစာပြွန်သည် နှလုံးနှင့် အလွန်နီးကပ်သောကြောင့် နှလုံး၏ လုပ်ဆောင်ချက် ပုံရိပ်များကို ပိုမိုရှင်းလင်းစွာ မြင်တွေ့နိုင်မည်ဖြစ်ပါသည်။

(ဓာတ်ပုံကိုးကား- https://trinitymedicalwny.org/cardiology/treatments-conditions/non-invasive-diagnostic-testing/transesophageal-echocardiogram/)

နှလုံးအာထရာဆောင်း စစ်ဆေးခြင်း၏ အကျိုးကျေးဇူးများ

နှလုံးအာထရာဆောင်း စစ်ဆေးခြင်းသည် ဆရာဝန်များအား အမျိုးမျိုးသော နှလုံးရောဂါ အခြေအနေများကို တိကျ၊ မြန်ဆန်၊ ထိရောက်စွာ ရောဂါရှာဖွေနိုင်ပြီး ပြင်းထန်မှုကို ဆန်းစစ်နိုင်စေပါသည်။ တွေ့ရှိရလေ့ရှိသော ပုံမှန်မဟုတ်သည့် အခြေအနေများမှာ-

• နှလုံးကြီးခြင်း
• နှလုံးကြွက်သား ထူထဲသည့်ရောဂါ (HCM)
• နှလုံးကြွက်သား အားနည်းခြင်း
• နှလုံးပျက်စီးခြင်း / နှလုံးစွမ်းဆောင်ရည် ကျဆင်းခြင်း
• မွေးရာပါ နှလုံးရောဂါများ
• နှလုံးသွေးကြောဆိုင်ရာ ပုံမှန်မဟုတ်ခြင်းများ (ဥပမာ- သွေးကြောကျဉ်းခြင်း သို့မဟုတ် သွေးခဲခြင်း)

စစ်ဆေးမှုအတွက် ကြိုတင်ပြင်ဆင်ရန်များ

     ယေဘုယျအားဖြင့် အစားအသောက်နှင့် ရေရှောင်ရန် မလိုအပ်ပါ။ သို့သော် အနည်းဆုံး ၆ နာရီခန့် အစာရှောင်ရန် လိုအပ်သော အချို့သော အထူးစစ်ဆေးမှု အမျိုးအစားများလည်း ရှိပါသည်။ သင့်တွင် အခံရောဂါများရှိ၍ ပုံမှန်သောက်နေသော ဆေးဝါးများရှိပါက စစ်ဆေးမှုလုပ်ငန်းစဉ်ကို ထိခိုက်နိုင်သဖြင့် ဆရာဝန် သို့မဟုတ် သူနာပြုအား ကြိုတင်အကြောင်းကြားပါ၊၊

စစ်ဆေးပြီးနောက် လိုက်နာရန် အကြံပြုချက်များ

     နှလုံးအာထရာဆောင်း စစ်ဆေးခြင်းသည် နှလုံးကျန်းမာရေးနှင့် ကုသမှုတိုးတက်မှုကို စောင့်ကြည့်ရန်အတွက် အလွန်အသုံးဝင်သော နည်းလမ်းဖြစ်သော်လည်း သတိပြုရန် သေးငယ်သော အချက်အချို့ ရှိပါသည်။ စစ်ဆေးပြီးနောက် ခေါင်းကိုက်ခြင်း၊ ကျော သို့မဟုတ် ဇက်ကြော မအီမသာဖြစ်ခြင်းကဲ့သို့သော ခေတ္တခဏ ဘေးထွက်ဆိုးကျိုးများ ခံစားရနိုင်ပြီး ထိုလက္ခဏာများသည် အချိန်တိုအတွင်း အလိုအလျောက် သက်သာပျောက်ကင်းသွားမည် ဖြစ်ပါသည်။

နှလုံးအာထရာဆောင်း ဝန်ဆောင်မှုဖြင့် "စောစီးစွာ သိရှိလျှင်၊ ဘေးအန္တရာယ် နည်းပါးမည်"

     နှလုံး၏ ပုံမှန်မဟုတ်သော အခြေအနေများကို ဘက်ပေါင်းစုံမှ စစ်ဆေးပေးသည့်အပြင် ကျွန်ုပ်တို့၏ အဆင့်မြင့် နှလုံးကျန်းမာရေး အထူးစစ်ဆေးမှု အစီအစဉ် (Advanced Intensive Heart Examination) သည် သင်ကျန်းမာသည်ဟု ခံစားရချိန်တွင်ပင် ငုပ်လျှိုးနေသော ပြဿနာများကို စိစစ်တွေ့ရှိနိုင်ပါသည်။ ဤဝန်ဆောင်မှုသည် လေ့ကျင့်ခန်းလုပ်စဉ် နှလုံးစွမ်းဆောင်ရည် စစ်ဆေးခြင်း (EST) နှင့် နှလုံးအာထရာဆောင်း (Echocardiogram) တို့ကို နှလုံးအထူးကုဆရာဝန်၏ အနီးကပ် စောင့်ရှောက်မှုအောက်တွင် ပေါင်းစပ်ဆောင်ရွက်ပေးထားခြင်းဖြစ်၍ လိုအပ်သောအချိန်၌ စောစီးစွာ ရောဂါရှာဖွေပြီး ကျန်းမာရေးဘေးအန္တရာယ်များကို လျှော့ချပေးနိုင်မည် ဖြစ်ပါသည်။