ကျောရိုးကျိုးခြင်းအတွက် သီးသန့် ဘိလပ်မြေ ထိုးကုသခြင်း

     ကျောရိုးဆစ်ကျိုးယှုံသည့်အခြေအနေသည် သက်ကြီးရွယ်အိုများတွင် အဖြစ်များပြီး အရိုးပွရောဂါ သို့မဟုတ် ကျောရိုးသို့ ပျံ့နှံ့လာသော ကင်ဆာရောဂါများကြောင့် အများအားဖြင့် ဖြစ်ပွားလေ့ရှိပါသည်။ ပုံမှန်နေ့စဉ်လှုပ်ရှားသွားလာရုံဖြင့်လည်း အရိုးအက်ကွဲပြီး ရုတ်တရက် ပြင်းထန်သော ခါးနာခြင်းကို ဖြစ်ပေါ်စေနိုင်ပါသည်။ ပုံမှန်သောက်ဆေးများဖြင့် ကုသသော်လည်း မသက်သာသော လူနာများအတွက် ကျောရိုးဆစ်အတွင်း စိမန့်ထိုး၍ ကုသခြင်း (Vertebroplasty & Balloon Kyphoplasty) သည် အရိုးကြံ့ခိုင်မှုကို အထောက်အကူပြုပြီး နာကျင်မှုကို လျှော့ချပေးကာ လှုပ်ရှားသွားလာမှုကို ပြန်လည်ကောင်းမွန်စေပြီး သင့်တော်စွာ ရွေးချယ်ထားသော ကျောရိုးဆစ်ကျိုးယှုံသူ လူနာများ၏ ဘဝအရည်အသွေးကို မြှင့်တင်ပေးနိုင်သည့် ဒဏ်ရာသေးငယ်သော ခွဲစိတ်ကုသမှုဖြစ်ပါသည်။

ကျောရိုးဆစ်ကျိုးယှုံခြင်းအကြောင်း သိကောင်းစရာ

     ကျောရိုးဆစ်ကျိုးယှုံခြင်း (Vertebral Compression Fractures) သည် ကျောရိုးအရိုးများ အားနည်းခြင်း (အရိုးပွခြင်း သို့မဟုတ် အရိုးသို့ ကင်ဆာပျံ့နှံ့ခြင်း) ကြောင့် ဖြစ်ပွားရခြင်း ဖြစ်သည်။ ခါးကိုင်းခြင်း၊ ချောင်းဆိုးခြင်း၊ အလေးအပင်မခြင်း သို့မဟုတ် သာမန် ခလုတ်တိုက်လဲကျရုံမျှဖြင့် အရိုးကျိုးယှုံသွားနိုင်ပါသည်။

မည်သည့် လက္ခဏာများ ပြသတတ်သနည်း ?

• ကျိုးသွားသော အရိုးနေရာတွင် ရုတ်တရက် ပြင်းထန်စွာ ကျောလယ်နာခြင်း
• လှုပ်ရှားစရာပြုလုပ်သည့်အခါ နာကျင်မှု ပိုမိုပြင်းထန်လာခြင်း
• အာရုံကြောကို ဖိမိပါက အောက်ပါအတိုင်း ဖြစ်ပေါ်နိုင်သည်-
  • ထုံကျင်ခြင်း
  • လက်ခြေများ အားနည်းခြင်း
  • ဆီးနှင့် ဝမ်း မထိန်းနိုင်ခြင်း

အာရုံကြောဆိုင်ရာ ပုံမှန်မဟုတ်သည့် လက္ခဏာများမရှိသော ကျောရိုးဆစ်ကျိုးယှုံသူ လူနာများတွင် ရှေးဦးကုသမှုခံယူပြီးသော်လည်း ပြင်းထန်သော နာကျင်မှု မသက်သာပါက စိမန့်ထိုးခြင်းသည် နာကျင်မှုကို သက်သာစေနိုင်သည့် အခြားရွေးချယ်စရာ နည်းလမ်းတစ်ခုဖြစ်ပြီး ဆရာဝန်က လူနာတစ်ဦးချင်းစီအလိုက် သင့်တော်မှုကို အကဲဖြတ်ပေးမည်ဖြစ်ပါသည်။

စိမန့်ထိုးနည်းလမ်းနှစ်ခု ယှဉ်ပြိုင်နှိုင်းယှဉ်ချက် (Vertebroplasty vs Balloon Kyphoplasty)

• Vertebroplasty: အရိုးစိမန့် (Bone Cement) ကို အရိုးခိုင်မာစေရန်နှင့် နာကျင်မှု လျှော့ချရန် ကျိုးပဲ့အက်ကွဲနေသော ကျောရိုးဆစ်အတွင်းသို့ တိုက်ရိုက် ထိုးထည့်ခြင်းဖြစ်ပါသည်။
• Balloon Kyphoplasty: ကျိုးယှုံနေသော ကျောရိုးဆစ်အတွင်းပိုင်း အခေါင်းပေါက်ကို ဘောလုံး (Balloon) ဖြင့် ချဲ့ပေးပြီး အရိုး၏အမြင့်ကို အချို့အတိုင်းအတာအထိ ပြန်လည်မြှင့်တင်ပေးကာ ယင်းဘောလုံးကို ပြန်ထုတ်ပြီး ကျောရိုးဆစ် ခိုင်ခံ့စေရန် စိမန့်ထိုးထည့်ခြင်း ဖြစ်ပါသည်။

ကုသမှု လုပ်ငန်းစဉ်နှင့် ပြန်လည်ကောင်းမွန်လာမှု

• မပြုလုပ်မီ: ကျိုးသွားသော ကျောရိုးဆစ်၏ တည်နေရာကို X-Ray သို့မဟုတ် MRI ဖြင့် သေချာစွာ စစ်ဆေးအတည်ပြုခြင်း။
• ပြုလုပ်စဉ်: လူနာအား မှောက်လျက်အနေအထားဖြင့် ထားရှိပြီး လိုအပ်သလို ထုံဆေးနှင့် ငြိမ်ဆေး သို့မဟုတ် မေ့ဆေး ပေးမည်ဖြစ်ပါသည်။ ဆရာဝန်သည် ဓါတ်မှန်စက် (X-Ray) ဖြင့် ကြည့်ရှုလမ်းညွှန်ကာ အပ်သေးသေးလေးကို အသုံးပြု၍ စိမန့်ကို ကျောရိုးဆစ်အတွင်းသို့ ထိုးထည့်မည်ဖြစ်ပါသည်။
• ကြာမြင့်ချိန်: ကျောရိုးဆစ် 1 ဆစ်လျှင် 1 နာရီခန့် ကြာမြင့်မည်ဖြစ်ပြီး စိမန့်သည် အချိန်တိုအတွင်း မာခဲသွားပါမည်။
• ပြန်လည်သက်သာလာမှု: ဒဏ်ရာသေးငယ်ပြီး မြန်ဆန်စွာ သက်သာလာမည်ဖြစ်ပါသည်။ အများအားဖြင့် ထိုနေ့တွင်ပင် အိမ်ပြန်နိုင် သို့မဟုတ် ဆေးရုံတွင် 1 ည အနားယူရမည်ဖြစ်ကာ အမြန်ဆုံး ပြန်လည် လမ်းလျှောက်နိုင်မည်ဖြစ်သည်။

ဖြစ်ပွားနိုင်သော ဘေးထွက်ဆိုးကျိုးနှင့် နောက်ဆက်တွဲ ပြဿနာများ

     ကျောရိုးဆစ်အတွင်း စိမန့်ထိုးခြင်းသည် အရိုးပြင်ပသို့ စိမန့်ယိုစိမ့်ခြင်း၊ ပိုးဝင်ခြင်း သို့မဟုတ် အာရုံကြောထိခိုက်ခြင်း ကဲ့သို့သော နောက်ဆက်တွဲ ပြဿနာများ ဖြစ်ပွားနိုင်ခြေရှိပါသည်။ သို့သော် ပြင်းထန်သော နောက်ဆက်တွဲပြဿနာများ ဖြစ်ပွားခဲပါသည်။ သို့ဖြစ်ပါ၍ ဆရာဝန်က လူနာတစ်ဦးချင်းစီအလိုက် ဖြစ်နိုင်ခြေများကို အကဲဖြတ်ပြီး သင့်တော်သော ကုသမှုနည်းလမ်းကို ရွေးချယ်ပေးမည်ဖြစ်ပါသည်။

ကုသမှုပြုလုပ်ပြီးနောက် မိမိကိုယ်ကို စောင့်ရှောက်ခြင်းနှင့် ကာကွယ်ခြင်း

• ဒဏ်ရာကို စောင့်ရှောက်ခြင်း: ပထမ 2–3 ရက်အတွင်း အပ်ထိုးထားသောနေရာ နာကျင်ပါက 1 နာရီလျှင် 15 မိနစ်ခန့် ရေခဲကပ်ပေးပါ (ရေခဲအိတ်ကို အဝတ်ဖြင့် ပတ်၍ အသုံးပြုပါ)။
• လှုပ်ရှားသွားလာခြင်း: ဆရာဝန်၏ ညွှန်ကြားချက်အတိုင်း စတင် လမ်းလျှောက်ခြင်းနှင့် ပေါ့ပါးသော လှုပ်ရှားမှုများကို ပြုလုပ်နိုင်ပါသည်။
• ရှောင်ကြဉ်ရန်အချက်: အနည်းဆုံး 6 သီတင်းပတ်ခန့် အလေးအပင်မခြင်းကို ရှောင်ကြဉ်ပါ။
• ဆက်လက်ကုသမှု: အရိုးသိပ်သည်းဆ မြှင့်တင်ရန်နှင့် အခြားနေရာများတွင် အရိုးထပ်မံ မကျိုးစေရန် အရိုးပွရောဂါကိုလည်း ပူးတွဲ စစ်ဆေးကုသရမည်ဖြစ်ပါသည်။

F&Q မကြာခဏ မေးလေ့ရှိသော မေးခွန်းများ