အမာရွတ်များကို အမြန်ဆုံး သက်သာပျောက်ကင်းအောင် မည်သို့ကုသမည်နည်း

     လက်ရှိ လူမှုကွန်ရက်ပေါ်တွင် ဟင်းချက်စသင်နေကြသည့် အိမ်ရှင်မသစ်လွင်များစွာ ရှိနေကြပါသည်။ ဟင်းကို ကျွမ်းကျင်စွာ မချက်တတ်သေးမီ အချိန်အတွင်း ဓားထိရှဒဏ်ရာ သို့မဟုတ် ဆီပူစင်သည့် ဒဏ်ရာရာဇဝင်များ ကျန်ရစ်ခဲ့ကြသည်မှာ သဘာဝပင် ဖြစ်ပါသည်။ အချို့ဒဏ်ရာများတွင် အမာရွတ်ကျန်ခဲ့ပြီး အချို့ဒဏ်ရာများတွင် အဘယ်ကြောင့် အမာရွတ် မကျန်ရစ်သနည်းဟု တွေးတောမိဖူးပါသလား။

အရေပြား၏ တည်ဆောက်ပုံကို အကြမ်းဖျင်း နားလည်ထားခြင်း

     ပုံမှန်အားဖြင့် ကျွန်ုပ်တို့၏ အရေပြားတွင် အပြင်ဘက်ဆုံး အရေပြားအပေါ်လွှာနှင့် အတွင်းဘက် အရေပြားအကင်းလွှာတို့ ပါဝင်ပါသည်။ ဖြစ်ပေါ်လာသော ဒဏ်ရာသည် အရေပြားအကင်းလွှာအထိ နက်ရှိုင်းပါက သို့မဟုတ် အကင်းလွှာအထိ ပိုးဝင်ပါက အမာရွတ် ထင်ကျန်စေနိုင်ပါသည်။ ထို့ပြင် အနာဖတ်ကို ခဏခဏ ခွာတတ်သူများတွင်လည်း အမာရွတ် ဖြစ်ပေါ်စေနိုင်ပါသည်။

.

အမာရွတ် အမျိုးအစားများ

• အသားချိုင့်ဝင်သွားသော အမာရွတ်များ - အဆိုပါနေရာရှိ အရေပြားသည် ပုံမှန်အရေပြားထက် ပိုမိုချိုင့်ဝင်နေသည်ကို တွေ့ရမည် ဖြစ်ပါသည်။
• အသားဖောင်းတက်လာသော အမာရွတ်များ - မာကျောသော အသားပိုများ ဖြစ်သော်လည်း မူလဒဏ်ရာအတိုင်းအတာအတွင်း၌သာ ဖောင်းတက်နေခြင်း ဖြစ်ပါသည်။
• ကီလွိုက် (Keloid) အမာရွတ်များ - ဖောင်းတက်သော အမာရွတ်နှင့် ဆင်တူသော်လည်း မူလဒဏ်ရာထက် ပိုမိုကြီးမားပြီး အခြားနေရာများသို့ ပျံ့နှံ့ထွက်လာသော အမာရွတ် ဖြစ်ပါသည်။ သာဓကအားဖြင့် နားဖောက်ရာတွင် အပေါက်သေးသေးလေးသာ ရှိသော်လည်း နားရွက်တွင် လက်ဖက်ရည်ပုလဲစေ့ခန့်ရှိသော ကီလွိုက်အမာရွတ် ကြီးထွားလာခြင်း ဖြစ်သည်။ ကီလွိုက် အမာရွတ်များ ပေါ်ပေါက်လွယ်သော နေရာများမှာ နားရွက်၊ မေးရိုး၊ ပခုံး၊ ရင်ဘတ်အလယ်နှင့် ကျောအလယ်တို့ ဖြစ်ကြပါသည်။

ဒဏ်ရာကျက်စနစ် ပုံမှန်မဟုတ်သူများသည် ကီလွိုက်အမာရွတ် ပေါ်ပေါက်ရန် လွယ်ကူသဖြင့် ခန္ဓာကိုယ် ထိခိုက်ဒဏ်ရာ မရရှိစေရန် အထူးဂရုစိုက်ရမည် ဖြစ်ပါသည်။

အမာရွတ်များအား ကုသခြင်း

အမာရွတ်အမျိုးအစားတစ်ခုချင်းစီ၏ ကုသမှုအဆင့်ဆင့်မှာ ကွဲပြားခြားနားမှု ရှိပါသည်။

• အမာရွတ်အမည်းစက်နှင့် အနီစက်များ - အမည်းစက်/အနီစက် လျှော့ပါးစေသော ဆေးလိမ်းခြင်း၊ နေလောင်ဒဏ်မှ ရှောင်ကြဉ်ခြင်း သို့မဟုတ် အမာရွတ်ဖျောက် လေဆာပြုလုပ်ခြင်းဖြင့် သက်သာစေနိုင်ပါသည်။
• အသားချိုင့်ဝင်သော အမာရွတ်များ - ဆရာဝန်မှ ကော်လာဂျင် ထုတ်လုပ်မှုကို လှုံ့ဆော်ပေးသည့် ဗီတာမင်အေ အက်စစ်ပါဝင်သော လိမ်းဆေးများ ပေးခြင်း၊ ခွဲစိတ်ခြင်း သို့မဟုတ် အသားမျှင်များကို လှုံ့ဆော်ပေးသည့် လေဆာဖြင့် ကုသပေးနိုင်ပါသည်။
• အသားဖောင်းတက်သော အမာရွတ်နှင့် ကီလွိုက်အမာရွတ်များ - ဆရာဝန်မှ စတီရွိုက်ဆေးထိုး၍ ကုသပေးနိုင်ပြီး အချို့လူနာများတွင် အအေးဓာတ်ဖြင့် ကုသခြင်း၊ လေဆာနှင့် ဓာတ်ရောင်ခြည်ပြခြင်းတို့ကို ပူးတွဲပြုလုပ်ရနိုင်ပါသည်။

အမာရွတ် ဖြစ်ပွားမှုကို လျှော့ချခြင်းနှင့် ကာကွယ်နည်းများ

     ဒဏ်ရာ ရရှိစကတည်းက စနစ်တကျ ပြုစုစောင့်ရှောက်ပါက အမာရွတ် ဖြစ်ပေါ်မှုကို လျှော့ချပေးနိုင်ပါသည်။ ပထမဦးစွာ ဒဏ်ရာကို သန့်ရှင်းစွာ ထားရှိပါ၊ ဒဏ်ရာကို အလွန်အမင်း ကုတ်ခြစ်ခြင်း မပြုရပါ၊ ဒဏ်ရာ မခြောက်သွေ့မီ ရေထိခြင်းမှ ရှောင်ကြဉ်ပါ။ ဒဏ်ရာ ကြီးမားပါက သို့မဟုတ် ရောင်ရမ်းပါက အရေပြားဆရာဝန်နှင့် စောစီးစွာ ပြသသင့်ပါသည်။ အနာဖတ် တက်လာပါက လုံးဝ မခွာရပါ။ အရေးကြီးသည်မှာ ဒဏ်ရာ စတင်ကျက်ချိန်တွင် အမာရွတ်ပျောက်ဆေး လိမ်းပေးပါက အမာရွတ် ဖြစ်ပေါ်မှုကို ထိရောက်စွာ ကာကွယ်ပေးနိုင်ပြီး ပါးပါးလျော့လျော့သာ ကျန်ရစ်မည် ဖြစ်ပါသည်။

ဒဏ်ရာရှိသော်လည်း အမာရွတ် မကျန်ရစ်ချင်ပါက ဒဏ်ရာရစကတည်းက ဆေးလိမ်းပေးခြင်းသည် အထိရောက်ဆုံး ကုသနည်းဖြစ်ပါသည်။